Bideni kritikon planin ekonomik të kryeministres Truss

Presidenti i SHBA-së, Joe Biden e ka kritikuar planin fillestar ekonomik të kryeministres britanike Liz Truss si një gabim dhe tha se ai nuk ishte i shqetësuar për rritjen e fuqisë së dollarit amerikan.

Truss të premten shkarkoi ministrin e saj të financave, Kwasi Kwarteng, dhe hoqi pjesë të paketës se tyre ekonomike pasi ajo shkaktoi trazira në tregun financiar, duke përfshirë një rënie të madhe në vlerën e paundit, shkruan Reuters të dielën.

Bideni i kritikoi shpesh politikat ekonomike konservatore të “rrëshqitjes” në Shtetet e Bashkuara të lidhura me ish-presidentin Ronald Regan dhe republikanët.

Shtëpia e Bardhë megjithatë kishte refuzuar më herët të komentonte mbi planin e Trussit, i cili fillimisht parashikonte heqjen e tatimit mbi të ardhura prej 45 për qind të Britanisë.

“Nuk isha i vetmi që mendova se ishte gabim”, u tha Bideni gazetarëve gjatë një ndalese në një dyqan akulloresh në Oregon, duke iu referuar propozimit të Trussit. “Unë nuk u pajtova me politikën, por kjo i takon Britanisë së Madhe ta bëjë atë gjykim, jo mua”.

Më herët të shtunën, ministri i ri i Financave i Britanisë, Jeremy Hung tha se disa nga taksat e vendit do të rriten dhe nevojiten vendime të ashpra për shpenzimet, duke thënë se Trussi kishte bërë gabime derisa luftonte për ta mbajtur postin e saj.