Australia heq nga përdorimi helikopterët “Taipan”

Ushtria australiane nuk do të përdorë më helikopterët MRH-90 Taipan pas rrëzimit të një helikopteri të tillë në muajin korrik, duke lënë të vdekur katër ushtarë, ka njoftuar ministria australiane e mbrojtjes.

Flota e Australisë ka më shumë se 40 helikopterë evropianë, por nuk ka përdorur asnjë që prej 28 korrikut kur një u rrëzua në Oqeanin Paqësor gjatë stërvitjeve ushtarake.

Ministri Richard marles ka thënë se ndalimi i përdorimit të helikopterëve Taipan është vendimi i vetëm që ka kuptim. Ai ka shtuar se vendimi ishte i pashmangshëm dhe është dashur të merrej menjëherë për të vënë në funksion helikopterët Black Hawks të prodhuar nga Shtetet e Bashkuara të Amerikës.

Qeveria në muajin janar kishte njoftuar për zëvendësimin e helikopterëve “Taipan” me helikopterët amerikanë. Australia ka nisur hetimet për rrëzimin e helikopterit dhe ka thënë se këto hetime do të zgjasin 12 muaj.

Pasi të sqarohen rrethanat e rrëzimit dhe të gjendet shkaku, Australia do t’i heqë nga përdorimi edhe zyrtarisht helikopterët “Taipan”.