-
Përktheu:
Ideal Zhubi
- 30 maj 2025 10:41
- Shpërndaje në:
Ministri i Mbrojtjes i Arabisë Saudite, Khalid bin Salman, u ka përçuar një mesazh të qartë zyrtarëve iranianë në Teheran muajin e kaluar, i cili i alarmon ata të pranojnë ofertën e presidentit të Shteteve të Bashkuara të Amerikës, Donald Trump, për marrëveshjen nukleare sepse, sipas tij, kjo paraqet një mundësi të mirë për të shmangur rrezikun e luftës me Izraelin.
Sipas Reutersit, i shqetësuar nga mundësia për destabilizim të mëtejshëm në rajon, mbreti 89-vjeçar i Arabisë Saudite, Salman bin Abdulaziz, dërgoi djalin e tij, princin Khalid bin Salman, që ta përcillte paralajmërimin te lideri suprem i Iranit, Ayatollah Ali Khamenei.
Bazuar në dy burime të afërta me rrethet qeveritare dhe dy zyrtarë iranianë, Reutersi ka shkruar se të pranishëm në takimin me dyer të mbyllura në Teheran, i cili u zhvillua më 17 prill në kompleksin presidencial, ishin presidenti iranian, Masoud Pezeshkian, komandanti i ushtrisë iraniane, Mohammad Bagheri dhe ministri i Jashtëm, Abbas Aragchi.
Ndonëse mediat e mbuluan vizitën e princit 37-vjeçar, përmbajtja e mesazhit të mbretit Salman nuk është raportuar më herët.
Princi Khalid, i cili kishte qenë ish-ambasadori i Arabisë Saudite në Washington, i paralajmëroi zyrtarët e lartë iranianë se presidenti amerikan nuk ka durim për negociata të stërzgjatura, sipas katër burimeve të afërta me Reutersin.
Sipas tij, do të ishte më mirë për Iranin të arrinte një marrëveshje me SHBA-në sesa të përballej me mundësinë e sulmeve nga Izraeli nëse bisedimet dështojnë, kanë thënë dy burime nga Gjiri Persik.
Bazuar në burimet e Reutersit, ai ka argumentuar se rajoni – tashmë i përçarë nga konfliktet e fundit në Gazë dhe Liban – nuk mund të përballonte një përshkallëzim të mëtejshëm të tensioneve.
Autoritetet në Arabinë Saudite dhe Iran nuk iu përgjigjën kërkesave për koment.
Vizita e Princit Khalid – vëllai më i ri i Princit të Kurorës Mohamed Bin Salman – ishte vizita e parë e një anëtari të lartë të familjes mbretërore saudite në Iran pas më shumë se dy dekadash.
Rijadi dhe Teherani zyrtar kanë qenë rivalë të përbetuar për një kohë të gjatë, duke mbështetur shpeshherë palë të kundërta në konfliktet rajonale, derisa një marrëveshje e ndërmjetësuar nga Kina në vitin 2023 ndihmoi në zbutjen e tensioneve dhe rikthimin e lidhjeve diplomatike.
