Kryeministri norvegjez Jonas Gahr Store ka thënë se aeroplani me të cilin po udhëtonte presidenti ukrainas Volodymyr Zelensky nga Moldavia drejt Oslos, gati sa nuk u godit nga një dron, njofton transmetuesi shtetëror norvegjez “NRK”.
Zelensky mbërriti në Norvegji të martën mbrëma për të marrë pjesë në funeralin e mbretit të ndjerë norvegjez, Harald V.
“Aeroplani me të cilin po udhëtonte gati sa nuk u godit nga një dron kur po ngrihej nga Moldavia”, tha Store. “Ky është realiteti në të cilin ai jeton”.
Store nuk tha se cili ishte burimi i këtij informacioni apo sa pranë avionit ishte droni.
Gjatë qëndrimit në Oslo, Zelensky zhvilloi bisedime me Storen, ndërsa të dy liderët u takuan gjithashtu me drejtues të industrisë së mbrojtjes për të diskutuar avancimin e një sistemi evropian kundër raketave balistike, me emrin e koduar FREYJA.
Në një postim në rrjetet sociale, Zelensky tha se takimi u përqendrua në ndarjen e përgjegjësive mes qeverive dhe kompanive të mbrojtjes, si dhe në dakordimin për hapat e nevojshëm për të prodhuar rezultatet e para praktike të programit.
Edhe
Zelensky pret që lufta të vazhdojë edhe gjatë dimrit
“Ne presim të shohim rezultatet e para praktike. Jam mirënjohës ndaj Norvegjisë për organizimin e këtij takimi. Falënderoj partnerët tanë për gatishmërinë për të punuar së bashku. Mbrojtja e qiejve të Evropës është përgjegjësi e përbashkët e jona”, tha presidenti ukrainas.
Komentet e tij erdhën ndërsa zyrtarët rajonalë ukrainas thanë se të paktën tetë persona u vranë në sulmet ruse të së mërkurës, përfshirë përgjatë kufirit Ukrainë-Moldavi dhe në juglindje.
Rusia nisi pushtimin e plotë të Ukrainës në shkurt të vitit 2022. Javën e kaluar negociatorët amerikanë zhvilluan takime në Moskë dhe Kiev në tentim për të arritur një marrëveshje paqeje.
