8 milionë jemenas mund të humbasin ndihmat humanitare në mars

Tetë milionë jemenas mund të humbasin ndihmat humanitare në mars, nëse nuk jepen fondet urgjente, në mes të një përshkallëzimi në një luftë të gjatë që muajin e kaluar shkaktoi numrin më të lartë të viktimave civile në të paktën tri vjet, kanë deklaruar zyrtarët e Kombeve të Bashkuara.

I dërguari i posaçëm i OKB-së, Hans Grundberg dhe Martin Griffiths që ishte në këtë detyrë para Grundbergut, i thanë Këshillit të Sigurimit të OKB-së të martën se janari ka treguar që gati dy të tretat e programeve kryesore të ndihmës të OKB-së janë zvogëluar ose mbyllur, ndërkohë që zonat e luftimit janë shumëfishuar.

OKB-ja ka paralajmëruar prej kohësh se lufta në Jemen që ka filluar nga viti 2014, ka shkaktuar krizën më të keqe humanitare në botë, por Griffiths paralajmëroi se "agjencive të ndihmës po u mbarojnë shpejt paratë, duke i detyruar ato të shkurtojnë programet e shpëtimit".

Sipas zyrës humanitare të OKB-së, plani humanitar i vitit 2021 për Jemenin mori 2,27 miliardë dollarë nga kërkesa prej 3,85 miliardë dollarësh, niveli më i ulët i financimit që nga viti 2015. Ndërkaq, plani i vitit 2022 nuk është publikuar ende.

“Programi Botëror i Ushqimit i OKB-së u detyrua të reduktonte racionet ushqimore për tetë milionë njerëz në dhjetor dhe duke filluar nga marsi ata tetë milionë njerëz mund të mos marrin fare ushqim - ose thjesht një racion të reduktuar", tha Griffiths.

Mungesa e financimit gjithashtu mund të privojë 3.6 milionë njerëz nga sigurimi i ujit të pijshëm dhe të përfundojë programet për të luftuar dhunën me bazë gjinore.