Të paktën 25 persona u vranë nga rrufeja dhe rrëshqitjet e dheut gjatë fundjavës në Bangladesh, derisa miliona njerëz mbetën të izoluar ose të pastrehë në pjesët e ulëta verilindore të goditura nga përmbytjet më të këqija në historinë e vendit, thanë zyrtarët.
Në shtetin fqinjë indian të Assamit, të paktën 17 persona u vranë gjatë valës së përmbytjeve që filloi këtë muaj, thanë zyrtarët e policisë të dielën.
Shumë nga lumenjtë e Bangladeshit janë ngritur në nivele të rrezikshme dhe rrjedhjet e shiut nga të gjithë malet indiane e përkeqësuan situatën, tha Arifuzzaman Bhuiyan, kreu i Qendrës shtetërore të Parashikimit dhe Paralajmërimit të Përmbytjeve, shkruan Reuters.
Mijëra policë dhe personel ushtrie janë vendosur në disa pjesë të vendit për të ndihmuar përpjekjet e kërkimit dhe shpëtimit.
Rreth 105,000 njerëz janë evakuuar deri më tani, por zyrtarët e policisë vlerësojnë se mbi katër milionë janë ende të bllokuar.
Syed Rafiqul Haque, një ish-deputet dhe politikan i partisë në pushtet në rrethin Sunamganj, tha se vendi po përballej me një krizë humanitare nëse nuk do të kryheshin operacionet e duhura të shpëtimit.
Edhe
30 të vdekur këtë javë nga përmbytjet në Indi e Bangladesh
“Pothuajse i gjithë brezi Sylhet-Sunamganj është nën ujë dhe miliona njerëz janë të bllokuar”, tha ai, duke shtuar se viktimat nuk kanë ushqim, uji i pijshëm dhe rrjetet e komunikimit ishin të dëmtuara.
Zyrtarët rajonalë thanë se rreth 3.1 milion njerëz u zhvendosën, 200,000 prej të cilëve qëndrojnë në strehimore të improvizuara të qeverisë në argjinaturat e ngritura ose në malësi të tjera.
