Të paktën 16 persona emigrantë kanë vdekur pasi anija ku ishin ata u përmbys në ishullin grek të Paros në detin qendror Egje në katastrofën e tretë detare që përfshin emigrantët këtë javë.
Autoritetet çuan varkat dhe aeroplanët në një operacion kërkimi dhe shpëtimi në veriperëndim të Paros të premten mbrëma. Trupat e 12 burrave, tre grave dhe një foshnje u gjetën në zonë.
80 persona besohet të kenë qenë në anije, për të cilën roja bregdetare beson se ishte nisur për në Itali nga Turqia.
Rrethanat në të cilat anija u përmbys ishin të paqarta.
Më shumë se 30 persona besohet se kanë humbur jetën në tre aksidentet.
Greqia është një nga rrugët kryesore për në Bashkimin Evropian për emigrantët dhe refugjatët nga Afrika, Lindja e Mesme dhe më gjerë, megjithëse fluksi është zvogëluar që kur më shumë se një milion njerëz përshkuan vendin drejt shteteve të tjera të BE-së më 2015 dhe 2016.
Më herët të premten, autoritetet thanë se kishin gjetur 11 trupa pasi një varkë me emigrantë u përmbys në një ishull të pabanuar në Greqinë jugore të enjten.
90 persona të tjerë u shpëtuan në atë operacion. Roja bregdetare ka thënë se informacionet fillestare sugjeronin se ata emigrantë ishin nisur gjithashtu për në Itali.