Te Vëllaznimi thonë se merituan rënien në Ligën e Parë

Në shumë raste faji mbetet jetim. Por jo në rastin e Vëllaznimit të Gjakovës. Te klubi gjakovar thonë se kanë merituar rënien nga Superliga e Kosovës në basketboll.

“Nuk është se nuk e kemi merituar rënien. Kemi bërë disa gabime që ndoshta ka nevojë për reflektim dhe mënyra më e mirë për të reflektuar është rënia në Ligën e Parë”, thotë trajneri i Vëllaznimit të Gjakovës, Dorant Hana për KOHËN të enjten. “Por është mëkat për qytetin, komunitetin e basketbollit, pasi Superliga ngre nivelin e komunitetit, njerëzve dhe fëmijëve të merren me basketboll. Besoj se duhet të rikthehemi së shpejti në Superligë.

Gjakovarët fituan 88:82 ndaj Pejës në “Shani Nushi”, të mërkurën mbrëma. Por nuk siguruan mbijetesën.

Te Vëllaznimi i Gjakovës ishin të sigurt se me fitore ndaj Pejës, në xhiron e fundit, do ta siguronin mbetjen në Superligën e Kosovës në basketboll. Por FBK-ja pak orë para ndeshjeve të xhiros së fundit, të mërkurën, dha skenarët se kush shpëton e kush bie, varësisht nga rezultatet. Në fund doli skenari 2: Vëllaznimi e Rahoveci 029 fituan, ndërsa Sigal Prishtina humbi.

Kështu të tri skuadrat përfunduan me nga 38 pikë. Prishtina u rendit e gjashta dhe luan në plejof, Rahoveci 029 përfundoi i shtati dhe mbetet në Superligë, ndërsa Vëllaznimi përfundoi i teti dhe bie nga Superliga.

Edhe Futboll 1 muaj më parë Vushtrria kthehet në Superligë pas gjashtë vjetësh

FBK-ja ka qartësuar se në një situatë të tillë, kur tri skuadra kanë pikë të barabarta, shikohet bilanci i atyre i skuadrave në ndeshjet e ndërsjella. Pra krijohet “mini-tabelë” e tri skuadrave.

Prishtina në ndeshjet me Rahovecin 029 dhe Vëllaznimin kishte pesë fitore e tri humbje. Rahoveci 029 kishte katër fitore e katër humbje. Dhe Vëllaznimi në ndeshjet me Prishtinën dhe Rahovecin 029 i kishte tri fitore e pesë humbje. Rrjedhimisht edhe mbeti i fundit dhe largohet nga Superliga.

“Nuk e kemi pritur mirë. Ditën e ndeshjes e kam marrë vesh që llogariten ndeshjet direkt. Pas ndeshjes me Prishtinën, komisari i garave ka thënë se shikohet koshdallimi  dhe fitorja e Rahovecit ndaj Yllit nuk do të ketë ndikim. Ka mjaftuar vetëm që ne ta fitojmë ndeshjen ndaj Pejës. Ditën e ndeshjes është marrë vendimi dhe kjo ka krijuar stres dhe huti. Ne si klub, unë si trajner, kryesia dhe lojtarët e kanë sjellë punën deri këtu. Është përgjegjësi e imja, lojtarëve dhe kryesisë. Përgjegjësia është e të gjithëve”, është shprehur trajneri i gjakovarëve.

Kryetari i klubit, Ideal Bakija, po ashtu tregon arsyet e rënies së Vëllaznimit nga Superliga.

“Kemi pasur një start të keq dhe na ka ndikuar në vazhdimësi. Përkundër investimeve nuk kemi mundur ta rikuperojmë startin e keq. Do të mundohemi sa më shpejt të kthehemi në Superligë”, thotë Bakija.

Ai thotë se ligjërisht FBK-ja kishte të drejtë, por jo edhe moralisht.

“Ka qenë një lëshim në propozicionet e garave të FBK-së, pasi në nenin 47.1.4 shkruan se nëse më shumë se dy ekipe kanë tubuar numër të njëjtë të pikëve, renditja përcaktohet vetëm në bazë kosh-diferencës të pikëve të shënuara në ndeshjet në mes tyre. Por neni 5 i propozicioneve thotë se që bazat e rregullave merren për bazë propozicionet e FIBA-s, të cilat thonë se nëse më shumë se dy skuadra përfundojnë me pikë të barabarta shikohen përballjet ndërmjet vete. Ne jemi bazuar në propozicionet e FBK-së dhe pak orë para ndeshjes FBK ka dalë me sqarim që për shkak të mospërputhjes, mbizotërojnë rregullat e FIBA-s. Moralisht në këto momente ndoshta nuk kanë të drejtë për faj të gabimit të tyre, por ligjërisht FBK-ja ka të drejtë”, ka thënë Bakija.

Edhe Basketboll 2 muaj më parë Tjetër goditje për Vëllaznimin – sanksionohet nga BAT-i

Derisa te Vëllaznimi pati dëshpërim pas ndeshjes kundër Pejës, te Rahoveci 029 pati lot gëzimi për mbetje në Superligë pas fitores dramatike ndaj Golden Eagle Yllit.

Ndeshja mes Yllit e Rahovecit 029 u vendos vetëm pas vazhdimit prej pesë minutave. Në kohën shtesë rahovecasit shënuan fitore 89:83 për mbetje në elitë.