Nesbitt po e udhëheq kthimin e fuqishëm të Yllit

Si pak basketbollistë amerikanë, Jalen Nesbitt, është kthyer në Kosovë për një edicion të dytë.

Ndonëse ka pasur telashe me një lëndim, Nesbitt po e gjen formën në momentin e duhur. Bashkë me të, fuqishëm po kthehet edhe Golden Eagle Ylli.

Në tri xhirot e kaluara, Ylli i Suharekës ka mposhtur skuadra pretendente për titull. Fillimisht e mposhti Trepçën me rezultat 82:74. Më pas fitoi thellë në udhëtim ndaj Sigal Prishtinës, 85:62. Ndërkohë të shtunën Ylli mposhti në Suharekë, Pejën me rezultat 72:64. Në xhiron e ardhshme, që është e 26-a, Ylli luan me liderin, Bashkimin, në Prizren.

Në tri fitoret e mëdha të suharekasve, Nesbitt ishte më i miri. Ndaj Trepçës i kishte 16 pikë, gjashtë kërcime e dy asistime. Ndaj Prishtinës ishte edhe më dominues me 18 pikë, 15 kërcime e pesë asistime.

Më i dalluari ishte edhe në fitoren ndaj Pejës, me 19 pikë e një kërcim. Në të tri këto ndeshje, amerikani me përvojë e kishte vetëm një top të humbur.

Edhe Basketboll 20 maj 2024 Nesbitt tregon se çka do ta vendosë ndeshjen vendimtare

“Kemi fituar tri ndeshjet e fundit dhe kjo do të thotë se kemi nisur të kthehemi në rrugën e duhur. Por kemi ende rrugë për të bërë që të jemi ekipi që dëshirojmë të jemi”, ka thënë Nesbitt të hënën për KOHËN.

Bashkë me formën e Nesbittit është rritur edhe forma e lojtarëve të tjerë të ekipit suharekas. Merita të mëdha për këtë vlerësohet se ka trajneri i njohur slloven, Alesh Pipan. Ylli po paraqitet pa kapitenin Gëzim Morina, që është i lënduar, por të tjerët po ofrojnë më shumë se në pjesën e deritashme të edicionit. Artin Gashi po e shfrytëzon maksimalisht hapësirën, ndërsa të rëndësishëm janë edhe Jan Palokaj, Lis Shoshi, Malcolm Armstead, Arian Qallakaj, Derrick Wilson e ndonjë tjetër.

Ylli mbetet në pozitën e gjashtë, por në garë që në plejof të startojë nga pozita e pestë dhe eventualisht pozita e katërt.

“Synimi ynë i madh është të fitojmë kampionatin. Por për momentin synimi është të vazhdojmë të bëhemi më të mirë pas secilës ndeshje dhe pas secilës stërvitje. Po ashtu që të përmirësojmë gabimet e vogla që mund të na bëjnë pretendentë për titull”, ka shtuar Nesbitt.

Ai u kthye tek Ylli në fillim të nëntorit, pasi kishte shkëlqyer në kampionatin e kaluar me suharekasit.

Por këtë edicion i ka vetëm dhjetë paraqitje në Superligë dhe katër të tjera në Ligën Unike. Ka munguar shumë ndeshje për shkak të një lëndimi.

“E kam pasur të lënduar kyçin e dorës me të cilën gjuaj dhe për këtë arsye kam munguar në ndeshje. Por jam i gatshëm të ndihmoj skuadrën në pjesën finale të kampionatit. Jam i entuziazmuar për sfidat që na presin. Do të jetë argëtuese”.

Pas largimit nga Ylli e deri te kthimi në skuadrën suharekase, nuk ka luajtur diku tjetër. Thotë se ka pushuar, është martuar dhe ka shijuar muajt në shtëpi.

Edhe Basketboll 31 mar 2025 Favoritët bien përballë Yllit, por suharekasit mbesin me “këmbë në tokë”

31-vjeçari ka luajtur në Spanjë, Sllovaki, Danimarkë dhe për të dytin edicion në Kosovë. Vjet Ylli në finale të plejofit u mposht nga Trepça.

“Në kampionatin e kaluar, top-ekipet ishin më të mira se tani. Këtë vit liga është dukshëm më e hapur dhe secili mund ta mposhtë secilin”, ka thënë Nesbitt, që po del të jetë “arma” kryesore e Yllit të Suharekës në synimin për të qëndruar gjatë në garën kampionale.