Hasbrouck me synime të qarta – dy trofe me Trepçën

Skuadrës iu bashkua pa shumë bujë, por po del të jetë “armë” e vërtetë e Trepçës në sulmin për trofe të tjerë në basketbollin kosovar.

Kishte të tillë që dyshonin nëse Kenny Hasbrouck do të jetë përforcim i denjë për “xehetarët”.

Megjithatë amerikani 39-vjeçar që nga dita e parë dëshmoi cilësi të pakontestueshme.  Iu bashkua Trepçës më 8 dhjetor.

Të dielën fundori ishte i pandalshëm në fitoren 98:81 të Trepçës ndaj Golden Eagle Yllit. I realizoi plot 27 pikë. Madje i qëlloi gjashtë prej nëntë tentimeve për tri pikë.

Është shifra më e lartë e pikëve e amerikanit prej se erdhi te Trepça. Në katër ndeshjet e para u ndal nën dhjetë pikë, por edhe përgjegjësi kishte më pak. Më pas fitoi minuta e po ashtu rriti numrin e pikëve. Realizoi 17 pikë, 14, 16 e të dielën plot 27. 

Edhe Basketboll 21 maj 2026 Trepça vazhdon me Hasbrouckun

Po luan me mesatarisht 13,4 pikë, 2,3 kërcime e 3,9 asistime për ndeshje.

“Jam shumë i kënaqur me rezultatin e ndeshjes ndaj Yllit. Ylli do të jetë një nga tri skuadrat më të mira të kësaj lige, ndaj kjo fitore ka pasur një rëndësi të madhe. Ne hymë në fushën e lojës me mentalitet dhe qasje shumë të mirë. Sigurisht, kemi ende gjëra për t’u përmirësuar, por për momentin kjo ishte një fitore e madhe për ne. Personalisht jam ndier mirë që realizova gjuajtjet e mia. Qëllimi im gjithmonë është të jem konstant në gjuajtje, kështu që ishte një mbrëmje e mirë për mua”, ka thënë Hasbrouck të hënën për KOHËN. 

Ai ka karrierë të gjatë e të suksesshme në basketbollin profesional. Para se t’i bashkohej Trepçës ishte në Meksikë. Ka luajtur edhe në elitën spanjolle, në Venezuelë, në Itali, Turqi, Gjermani. Në Spanjë e në Itali ka luajtur në nivelin e parë e edhe në të dytin. Dhe përvojën që e ka fituar në basketbollin profesionist nga viti 2010 e tutje, Hasbrouck tani e ka vënë në dispozicion të Trepçës.

Ai është pranuar mirë nga tifozët, ndërsa e vlerëson përkrahjen e tyre.

“Atmosfera në Mitrovicë është fantastike. Tifozët na japin një avantazh të madh dhe na motivojnë gjatë ndeshjeve me energjinë e tyre, duke ushtruar presion mbi skuadrat kundërshtare. E dua shumë lojën në shtëpi këtu dhe shpresoj që ata të vazhdojnë të sjellin këtë energji për gjithë sezonin, në garën për Kupë dhe në ndeshjet e plejofit”, ka theksuar Hasbrouck. 

Trepça është në seri prej dhjetë fitoreve në Superligë. Momentalisht duket skuadra me gjasat më të mëdha për të fituar titullin e kampionit. Po ashtu është në gjysmëfinale të Kupës së Kosovës, ku do të përballet në dy ndeshje me Borën.

Edhe Basketboll 8 dhj 2025 Trepça prezanton amerikanin Hasbrouck

“Kam ardhur te Trepça me një qëllim dhe ai është të fitoj. E njoh historinë e pasur këtu dhe ajo përputhet me qëllimet e mia që për çdo sezon që luaj, të fitoj. Së pari duam të fitojmë Kupën, pastaj të mbyllim sezonin e rregullt në vendin e parë dhe në fund të fitojmë kampionatin. Duhet të fokusohemi çdo ditë te fitorja dhe të përmirësojmë gjërat e vogla, por qëllimi im gjithmonë do të jetë të fitoj”. 

Trepça ka dominuar në basketbollin kosovar në vitet e fundit.