Qytetarët presin ndryshime pozitive, politikanët bënë thirrje të shfrytëzohet e drejta

Thirrje për ta ushtruar të drejtën për votë u kanë adresuar liderë politikë e ata shtetërorë qytetarëve në Shqipëri, në ditën e zgjedhjeve nacionale.

Pasi e shfrytëzoi këtë të drejtë në Tiranë, presidenti i Shqipërisë, Bajram Begaj, tha se zgjedhjet duhet të rezultojnë me përmbushje të standardeve më të mira.

Kësaj thirrjeje, iu bashkuan pas votimit edhe kryeministri aktual e lideri i Partisë Socialiste, Edi Rama dhe kryetari i Partisë Demokratike, Sali Berisha.

“Thirrje zemre, të votojnë të votojnë për veten e tyre, për fëmijët, pensionet dhe rrogat e tyre, punën, punësimin, biznesin fermën e tyre, të votojnë për të ardhmen. Do të kemi një ditë të dytë vere, thirrja ime votoni, votoni”, ka deklaruar ai.

E qytetarët kanë shprehur pritshmëri të larta, tek e kanë ushtruar të drejtën e votës për zgjedhjen e përbërjes së re të Kuvendit.

Për zgjedhjet parlamentare të së dielës, të drejtë vote kanë pasur mbi 3 milionë e 713 mijë shtetas të Shqipërisë.

Në garë për 140 ulëse në Kuvend kanë qenë 2 mijë e 46 kandidatë nga gjithsej 11 subjekte politike.

Për këto votime është miratuar sistem i ri zgjedhor, që përfshin një kombinim të listave të mbyllura dhe të hapura. Rreth një e treta e listës së kandidatëve është e mbyllur dhe emrat janë të fiksuar nga kryetari, ndërsa dy të tretat e tjera janë të hapura.

Për emrat në listë të hapur nuk do të ketë prag. Këto janë zgjedhjet e 11-a parlamentare që organizohen në Shqipëri që pas rënies së komunizmit, e të parat në të cilat do të marrin pjesë edhe votues nga diaspora.