Xhandarmëria serbe hyn në territorin e Kosovës, Qëndron Kastrati thotë se është kërcënim direkt

Kreu i Komunës së Kamenicës, Qëndron Kastrati përmes një postimi në Facebook ka thënë se sot xhandarmëria serbe ka hyrë në territorin e Kosovës, duke terrorizuar banorët e Karaqevës.

Sipas tij një gjë e tillë është e papranueshme dhe kërkon përgjegjësi nga KFOR-i.

“Është e papranueshme hyrja e xhandarmërisë serbe në territorin e Kosovës, të shpallur gabimisht me marrëveshje të Kumanovës si zonë neutrale”, ka shkruar ai.

Ai shton se ky është kërcënim direkt për qytetarët e Karaqevës dhe Kosovën.

“Terrorizimi i banorëve të Karaqevës nga forcat serbe është i papranueshëm dhe për këtë duhet të bartin përgjegjësi edhe forcat e KFOR-it. Ajo zonë është përcaktuar si zonë neutrale (edhe pse gabimisht) dhe e vetmja forcë që ka të drejtë hyrje në atë zonë është KFOR-i. Hyrja e xhandarmërisë serbe në atë zonë dhe kontrollet që i bëjnë njerëzve është kërcënim direkt për qytetarët e Karaqevës në veçanti dhe për gjithë shtetin e Kosovës në përgjithësi”, ka shkruar Kastrati.

Ai ka shtuar tutje se, “u desh të largohem në gjysmë të takimit dhe diskutimit me kryetarët e komunave të regjionit tonë për hapat që duhet të ndërmarrim si regjion për trajtimin e COVID-19 dhe në këto momente jam duke shkuar pranë atyre qytetarëve që po përballen me këtë situatë kërcënuese. Kjo është e papranueshme”.