VV-ja kërkon nga Komuna e Prishtinës të rrisë sigurinë në shkollat fillore dhe të mesme

Lëvizja Vetëvendosje ka reaguar pas therjes për vdekje të një nxënësi 14-vjeçar në Prishtinë.

Përmes një komunikate për media, VV-ja thotë se shkolla është ku jetësohet dija, jo ku strehohet krimi.

VV-ja shkruan se plagët e shumta me thikë që i mori një nxënës në Kodrën e Trimave ia sollën vdekjen.

“Në afërsi të shkollës, një 14 vjeçar mbytet nga një tjetër. Në vend se të shkojë në bankat shkollore, ai e gjeti vdekjen. Të tronditur nga kjo ngjarje fillimisht shprehim ngushëllimet tona te familja e të ndjerit dhe shoqet e shokët e tij të klasës”, thuhet në komunikatë.

Sipas Vetëvendosje, siguria në shkollë duhet të jetë prioriteti mbi prioritete, emergjenca më e madhe e pushtetit komunal.

Edhe Kronikë 2 mar 2022 Dërgohet në mbajtje për 48 orë i dyshuari për vrasjen e 14-vjeçarit në Prishtinë

Vetëvendosja ka kërkuar nga Komuna e Prishtinës që menjëherë të marrë hapat e domosdoshëm për të rritur sigurinë nëpër shkollat fillore e të mesme.

“Ftojmë organet komunale të Prishtinës të koordinojnë veprimet së bashku me Ministrinë e Punëve të Brendshme dhe Ministrinë e Arsimit në mënyrë që niveli i sigurisë të shtohet në shkollat e komunës sonë. Të prekur e të tronditur nga ky rast, shprehim edhe njëherë ngushëllimet tona dhe kërkojmë masa emergjente, të domosdoshme dhe të menjëhershme ne këtë drejtim”, thuhet në njoftim.