Universiteti “Haxhi Zeka” paditet nga tre profesorë

Vendimi i Këshillit Drejtues të Universitetit “Haxhi Zeka” në Pejë për ta shfuqizuar zgjedhjen e katër anëtarëve të rinj të tij ka përfunduar në gjykatë. Tre profesorë e kanë paditur universitetin, duke e cilësuar vendimin të jashtëligjshëm. Ata insistojnë se organi drejtues nuk ka pasur as kuorum të mjaftueshëm. E kryesuesja e KD-së, Emine Abdyli-Pozhari, thotë se ka vepruar në përputhje me statutin dhe opinionin e MASHTI-t

Tre profesorë e kanë paditur Universitetin “Haxhi Zeka” në Pejë, me arsyetimin se në mënyrë të kundërligjshme e për motive politike, Këshilli Drejtues i këtij institucioni e ka shfuqizuar vendimin e Senatit për zgjedhjen e katër anëtarëve të rinj në këtë këshill.

Në mbledhjen e senatit të datës 1 korrik si anëtarë me mandat 3-vjeçar të Këshillit Drejtues u zgjodhën profesorët: Hajrija Shkriejlj, Arsim Kelmendi, Berat Aqifi dhe Valdrin Misiri.

Por, vetëm një ditë më pas, Këshilli Drejtues, nën kryesimin e Emine Abdyli-Pozharit vendosi ta anulonte këtë vendim, me arsyetimin se katër anëtarët ishin zgjedhur nga përbërja e re e senatit, së cilës nuk i fillon mandati para 1 tetorit, kur nis viti akademik.

Në padinë e profesorëve Shkrijelj, Misiri dhe Aqifi, theksohet se Këshilli Drejtues nuk ka kompetenca për t’i shfuqizuar vendimet e senatit dhe se vendimi është marrë pa kuorum të nevojshëm. 

Sipas tyre, zgjedhjet për anëtarët e KD-së janë organizuar nga Komisioni Qendror Zgjedhor i universitetit, i cili pas përmbylljes së procesit ka konstatuar se gjithçka ka përfunduar me sukses.

“Për më tepër, duhet theksuar se Senati i Universitetit është organi i cili, në përputhje me Statutin e UHZ-së, i zgjedh anëtarët e Këshillit Drejtues dhe jo anasjelltas. Kjo e bën tërësisht të paqartë, të pabazuar dhe përbën tejkalim të kompetencës dhe keqpërdorim të detyrës zyrtare kur kryesuesja e Këshillit Drejtues, në mungesë kuorumi dhe në mënyrë të njëanshme, me anëtarë të vjetër (nën veprimet e konfliktit të interesit) vendos ta shfuqizojë vendimin e Senatit për zgjedhjen e anëtarëve të rinj të Këshillit Drejtues”, thuhet në padinë e profesorëve.

Në një përgjigje për KOHËN, kryesuesja e Këshillit Drejtues, Emine Abdyli-Pozhari, ka mohuar se ky organ i ka tejkaluar kompetencat.

Ka thënë se vendimi për shfuqizimin e atij të Senatit është marrë për ta ruajtur ligjshmërinë, meqë, sipas Statutit dhe opinionit të MASHTI-t, senati në përbërje të re nuk ka mandat para datës 1 tetor. 

Sipas saj, në mbledhjen e datës 2 korrik kanë marrë pjesë tetë nga nëntë anëtarët e KD-së përfshirë rektorin, i cili nuk ka të drejtë vote.

Në momentin e votimit, tre anëtarë me të drejtë vote u përjashtuan për ta shmangur konfliktin e interesit.

“Nga pesë (5) anëtarët që kanë mbetur të pranishëm, katër (4) prej tyre kanë pasur të drejtë vote – duke e përmbushur minimumin e kërkuar prej katër anëtarësh me të drejtë vote për vendimmarrje valide, sipas Statutit”, ka thënë Emine Abdyli-Pozhari.

E profesori Valdrin Misiri ka vlerësuar se këto veprime përbëjnë ndërhyrje të rëndë dhe, sipas tij, të pajustifikueshme në një proces demokratik.

“Vendimi i datës 2 korrik është qartësisht i kundërligjshëm dhe në kundërshtim me statutin e UHZ-së. Kryesuesja e KD-së, znj. Abdyli, ka ndërmarrë hapa të paligjshëm duke e shfuqizuar, pa të drejtë dhe pa rend dite, vendimin për komisionin profesional për zgjedhjen e rektorit, si dhe zgjedhjen e katër anëtarëve të rinj të KD-së nga Senati. Ky veprim përfaqëson ndërhyrje të drejtpërdrejtë në një proces zgjedhor tashmë të përfunduar, duke e shkelur autonominë institucionale dhe vullnetin e organeve zgjedhore, ka thënë Misiri. “Këto veprime janë tërësisht të paarsyeshme dhe znj. Abdyli duhet të japë llogari për to para organeve përgjegjëse”.

Abdyli-Pozhari për vendimin është thirrur edhe në opinionin e MASHTI-t, ndonëse ai ishte lëshuar 13 ditë pasi është marrë vendimi nga Këshilli Drejtues.

MASHTI, përmes një përgjigjeje, ka konfirmuar se opinioni ligjor është lëshuar më 15 korrik.