Tuneli i “Kurrizit” mbulohet nga bërlloku, Rama thotë se temperaturat ndalën punimet

Gjashtë muaj pas fillimit të punimeve, tuneli i “Kurrizit” nuk duket as për së afërmi ashtu siç paraqitej në fotografitë që shpërndante kryetari i Prishtinës, Përparim Rama.

Përveç që nuk është punuar që projekti të marrë formë deri tash, tuneli i “Kurrizit”, është shndërruar në një deponi mbeturinash.

Qëkur u vendos të nisnin punimet në tunel, deri tash nuk është parë ndonjë punëtor të punojë aty.

Ndërkohë kryetari Përparim Rama ka deklaruar që për shkak të temperaturave të ulëta, dinamika e punimeve është zvogëluar por jo ndaluar tërësisht.

Ai ka premtuar se deri në fund të mandatit të tij tuneli do të përfundojë.

Edhe Arbëri 3 kor 2025 6 ditë pas përurimit, tuneli i Kurrizit i mbyllur shkaku i punimeve të papërfunduara

“Në atë pjesë janë duke vazhduar punët, mirëpo, nuk janë duke vazhduar ato punime të cilat janë stopuar nga temperaturat e ulëta. Ne kemi punë të mëdha në atë pjesë, ku duhet të përdoret betoni dhe derisa temperaturat janë nën 4 gradë celsius nuk mund të fillojmë, për këtë arsye janë ngadalësuar punimet në mënyrë kohore. Punët nuk do të ndalen, aty do të vazhdojnë me dinamikën e njëjtë. Gjithsesi do të përfundojë gjatë mandatit tim ky projekt”, ka thënë ai.

Fjalët e Ramës për përfundimin e tunelit, nuk i beson opozita në kryeqytet.

Besart Krasniqi nga Lëvizja Vetëvendosje, vonesën në përfundimin e projektit e quan papërgjegjësi totale.

“Gjendja në terren tregon diçka tërësisht ndryshe nga ajo që po thotë kryetari Rama. Kjo për faktin që aty është intensiteti shumë i ulët i punimeve edhe pse ka qenë e premtuar nga komuna që ky projekt të përfundojë në qershor të vitit të kaluar, tash e po e shohim që aty më shumë nuk punohet sesa që punohet dhe në këtë mënyrë po dëmtohen edhe bizneset përreth. Kjo situatë po paraqet problem edhe për banorët e lagjes ‘Dardania’. Kjo tregon një papërgjegjësi totale nga Komuna e Prishtinës në realizimin e punëve. Këtu edhe po dëmtohet buxheti i komunës por edhe po dëmtohet qytetari i Prishtinës”, ka thënë Krasniqi.

Krasniqi shprehet skeptik në përfundimin e projektit derisa thotë se mbyllja e tunelit ka shkaktuar edhe trafik në qytet.

Rinovimi i këtij tuneli, Prishtinës do t’i kushtojë 1.2 milion euro.

Edhe Arbëri 24 maj 2026 Rama fajëson MPB-në për bllokimin e projektit për ndërtimin e Spitalit të Prishtinës

Rama punimet në tunelin e “Kurrizit” i pati quajtur rinovim artistik e infrastrukturor.

Projekti është paraparë të përfundojë në 240 ditë pune dhe finalizimi i tij kah mesi i vitit 2025. Por deri në këtë afat kanë mbetur pak më shumë se tre muaj.