Togeri policor suspendohet pasi shkoi i uniformuar në ngushëllime për Faton Hajrizin bashkë me kolegët

Një toger policor është suspenduar pasi shkoi për ngushëllime i uniformuar për Faton Hajrizin. Togeri policor është vetëm një nga njerëzit me pushtet, të cilët e kanë nderuar Faton Hajrizin, i dënuar në Kosovë edhe për plagosje të policëve. Në vazhdën e atyre që e kanë nderuar Faton Hajrizin si hero, meqë ai vrau një polic serb, kanë hyrë edhe deputetë të Kuvendit të Kosovës.

Zyrtari policor i nivelit më të lartë që shkoi për ngushëllime për Faton Hajrizin është suspenduar nga Policia, pasi ky institucion e zbatoi rekomandimin e Inspektoratit Policor të Kosovës.

IPK-ja të martën njoftoi se ka rekomanduar suspendimin shkaku që po dyshon për shkeljen e rëndë - “Sjellje e rëndë diskredituese”. 

E Policia në një përgjigje për KOHËN ka thënë se e ka zbatuar rekomandimin. 

“Policia e Kosovës është institucion i zbatimit të ligjit dhe në të gjitha rastet, përfshirë edhe këtë, veprimet e saj i ndërmerr komfor autorizimeve ligjore që ka dhe rekomandimeve të IPK-së, duke zbatuar të njëjtat”, thuhet në përgjigje.

Por hetimi, përveç lidhur me togerin policor, po vazhdon edhe për zyrtarët e tjerë policorë të rangut më të ulët që ishin me të.

Edhe Arbëri 13 gus 2024 IPK-ja rekomandon pezullimin e togerit policor, dyshohet se shkoi për ngushëllime te familja e Faton Hajrizit

Burimet në IPK thonë se për ngushëllime ishin rreth 20 zyrtarë policorë. 

“Veprimet që do të ndërmerren tutje janë të natyrës hetimore administrative deri në përfundimin e rastit. IPK-ja është në proces të verifikimit dhe analizimit të fotografive për të identifikuar zyrtarët e tjerë policorë. Inspektorati Policor ka filluar hetim disiplinor nën dyshimin se togeri policor së bashku me vartësit e tij kanë kryer shkelje të rëndë disiplinore -"Sjellje e rëndë diskredituese” e paraparë me aktet nënligjore të Policisë së Kosovës. Hetuesit e IPK-së pritet që në kuadër të angazhimeve për këtë rast të intervistojnë togerin policor e pastaj edhe zyrtarët e tjerë pas identifikimit të tyre”.

Ata shkuan për ngushëllime të uniformuar dhe në orar të punës.

I kontaktuar nga KOHA, komandanti i Stacionit Policor të Skenderajt, togeri Muhamet Kajtazi, ka thënë se nuk dëshiron të komentojë për këtë vendim. 

Për ngushëllime te familja Hajrizi një ditë më parë ka qenë edhe ish-deputeti i AAK-së, Daut Haradinaj. 

Faton Hajrizi, i dënuar nga gjykatat kosovare, përfshirë edhe plagosjen e policëve të Kosovës, është vrarë në Lloznicë të Serbisë, pasi u arratis nga Kosova. 

Edhe Arbëri 16 pri 2026 IPK-ja rekomandon suspendimin e një rreshteri dhe një togeri në dy raste të ndara

Kryeministri Albin Kurti ka thënë në një hapje të mbledhjes së Qeverisë në javën kur u vra Hajrizi se ai nuk duhet të heroizohet. 

Për dallim nga Ekzekutivi, disa deputetë të PDK-së Hajrizin e vlerësuan si “hero”.