Myftiu i Kosovës, Naim Tërnava, ka uruar besimtarët myslimanë me rastin e nisjes së muajit të Ramazanit, duke bërë thirrje për ndaljen e konflikteve në botë.
Në adresimin për media të dielën, Tërnava ka thënë se ky muaj është i mirësisë dhe faljes.
“Lutemi që i plotfuqishmi të pranojë agjërimin dhe lutjet tona, t’i japë kombit tonë, shtetit dhe fesë sonë siguri dhe stabilitet. Lutemi që konfliktet, luftërat dhe gjakderdhjet ndërmjet njerëzve pa dallim race, ngjyre, feje apo kombi të marrin fund”, ka thënë Tërnava.
Ai më tej theksoi se besimtarët duhet t’i përkushtohen këtij muaji duke ruajtur dhe kultivuar lidhjet familjare dhe duke refuzuar çdo formë të ndasisë dhe përçarjes mes njerëzve.
“Në këtë natë të madhe, në këtë atmosferë hyjnore ftoj besimtarët tanë kudo që janë që këtij muaji të bekuar t’i përkushtohen me bindje, adhurim, sinqeritet dhe solidaritet, duke ruajtur dhe kultivuar lidhjet familjare dhe duke e shtrirë dorën e ndihmës ndaj të varfërve, duke thirrur në forcim të unitetit dhe vëllazërisë dhe duke refuzuar të gjitha format e ndasisë dhe përçarjes mes vete”, është shprehur Tërnava.