Të gjitha takimet e sotme të ambasadorit Delawie me deputetë të Kosovës

Gjatë ditës ka zhvilluar shumë takime me deputetë të Kuvendit të Kosovës dhe aty, ambasadori amerikan thotë se ua ka bërë të qartë se Departamenti amerikan i Shtetit, e ka shqyrtuar me kujdes marrëveshjen për demarkacion me Malin e Zi, raporton KTV.

Në një deklaratë ekskluzive, ambasadori Greg Delawie ka thënë se është takuar me deputetë të partive të ndryshme politike në Kosovë.

Ai ka shtuar se u ka kërkuar zyrtarëve të Qeverisë që menjëherë të dërgojnë në Kuvend draftin e marrëveshjes dhe që të njëjtën ta votojnë menjëherë deputetët e Kuvendit.

Sipas ambasadorit, marrëveshja për demarkacion nuk është një nga vendimet e vështira që Kosova duhet të marrë në rrugëtimin e saj në Evropë, sepse ajo si e tillë është e saktë.

Ambasadori amerikan, gjatë ditës së martë ka qenë pjesë e disa takimeve me deputetë të Kuvendit, për t’i bindur ata që të votojnë versionin aktual të marrëveshjes për shënim të kufirit me Malin e Zi.