Surroi: Me zgjedhjen e nënkryetarit u konfirmua se nuk ekziston e drejta e vetos e asnjë grupi politik

Publicisti Veton Surroi ka vlerësuar se me zgjedhjen e sotme të nënkryetarit të Kuvendit të Republikës së Kosovës nga radhët e komunitetit serb është konstituuar Kuvendi.

Sipas tij me këtë akt deputetët e shumicës kanë përmbushur, pos detyrës së konstituimit, edhe  obligimin e respektit të të drejtave të një komuniteti joshumicë. 

Surroi ka thënë se ideja e vazhdimit të punëve të Kuvendit me karrige të zbrazët për përfaqësuesin nga komuniteti serb do të çonte në shkelje kushtetuese.

“Me zgjedhjen e sotme të nënkryetarit u konfirmua se nuk ekziston e drejta e vetos e asnjë grupi politik dhe se moszgjedhja e nënkryetarit serb ishte produkt i bllokimit nga shumica, jo nga komuniteti serb. Akuzat që u bënë kundër përfaqësuesve të komunitetit serb për bllokim, përfshirë ato që u dërguan si komente në Gjykatën Kushtetuese, qenë të pavenda dhe nuk kontribuan për ngritje të besimit të ndërsjellë”, ka shkruar Surroi në Facebook.

Ai ka thënë se deputetët e Listës Serbe ndoqën procedurat kushtetuese, përfshirë edhe ankesën pranë Gjykatës Kushtetuese. 

Edhe Arbëri 8 tet 2025 Kushtetuesja nuk lejon veto për Listën Serbe

“Lista Serbe sot deklaroi se janë shkelur Kushtetuta dhe aktgjykimi i Kushtetueses me rastin e votimit të sotëm dhe si argument jep tekstin e ankesës së bërë rreth kësaj çështje : ‘[...] fituesi i zgjedhjeve nga radha e komunitetit serb duhet të ketë të drejtën ekskluzive për të propozuar nënkryetarin për komunitetin serb, ashtu siç fituesi i zgjedhjeve ka të drejtën ekskluzive për të propozuar kryetarin e Kuvendit nga radha e komunitetit shqiptar’”, ka shkruar ai duke cituar ankesën e Listës Serbe.

“Ky argument është i gabueshëm dhe një lexim më i kujdesshëm i Kushtetutës e i aktgjykimit të Gjykatës Kushtetuese tregon se nuk ka ‘fitues të zgjedhjeve’ dhe nuk ka ‘të drejtë ekskluzive’. Nuk ekziston monopoli i përfaqësimit të serbëve, siç nuk ekziston monopoli i përfaqësimit të asnjë komuniteti në Kosovë”, ka shkruar tutje Surroi.