Publicisti Veton Surroi ka thënë se duhet përbashkuar forcat politike, përfshirë ato të pushtetit dhe të opozitës dhe të përcaktohet te debati politik që aktgjykimi i Dhomave të Specializuara të Kosovës në Hagë nuk e akuzon Ushtrinë Çlirimtare të Kosovës dhe rrjedhimisht nuk mund të ketë ndonjë implikim as në Pavarësinë e Kosovës.
Surroi në emisionin “Konfront” në KTV është shprehur se pas këtij përbashkimi, aktgjykimin do të duhej trajtuar në tërësi, si në aspektin e personalizimit të krimeve, ashtu edhe në dinjitetin e tyre por edhe të të akuzuarve.
“Te debati politik duhet të ketë një përbashkim të forcave politike, të lidershipit të pushtetit dhe opozitës dhe të përcaktohet se ky aktgjykim qartazi nuk e akuzon UÇK-në dhe nuk mund të ketë implikime as për Pavarësinë e Kosovës. Asnjë aktgjykim nga cilado Gjykatë nuk mund të ndërrojë dy fakte historike – UÇK-ja ka zhvilluar luftë të drejtë dhe është njëri nga faktorët e pavarësisë së Kosovës dhe pavarësia e Kosovës ka ardhur edhe për shkak të luftës së drejtë të UÇK-së. Nëse përbashkohen forcat politike rreth kësaj shkojmë te hapi tjetër dhe këtë aktgjykim duhet trajtuar në tërësinë e tij. Duhet trajtuar edhe nga aspekti i personalizimit të krimeve dhe nga aspekti i dinjitetit të të akuzuarve, edhe nga aspekti i dinjitetit të viktimave e kështu me radhë”, ka thënë Surroi.
Publicisti Surroi ka folur edhe për efektet që pritet të ketë publikimi i aktgjykimit nga Gjykata Speciale. Sipas tij një pjesë e tij pritet të përmbajë rrëfime për dhunë mes shqiptarëve – narracion që vazhdon edhe sot që nga viti 1997.
“Kemi një aktgjykim dhe duhet ta trajtojmë sepse ai aktgjykim në momentin që do të dalë ka së paku dy efekte; narracionin e vetë juridik dhe do të duhej të merrej një strukturë për të kuptuar se çka ka ndodhur brenda këtij gjykimi dhe e dyta është narracioni politik. Një pjesë e këtij rrëfimi që do të dalë nga aktgjykimi ose është paralajmëruar të dalë së paku nga aktgjykimi i kondenzuar çfarë na është ofruar, është fërkimi politik brenda shqiptarëve, brenda luftës, që ka nënkuptuar edhe përdorimin e dhunës mes shqiptarëve. Ky është narracion që vazhdon që nga viti 1997 deri më sot. Ky është një narracion që tash po e trashëgojnë gjeneratat e reja”, ka thënë Surroi.
Edhe
Surroi: Mungesa e provave për krimet kundër njerëzimit vërteton se tek UÇK-ja kjo s’ka ekzistuar
Të mërkurën, Specialja shqiptoi dënim me burgim prej 81 vjetësh për Hashim Thaçin, Kadri Veselin, Rexhep Selimin dhe Jakup Krasniqin për krime lufte, e i shpalli të pafajshëm për krime kundër njerëzimit.
Ish-udhëheqësit e Ushtrisë Çlirimtare të Kosovës u dënuan për krime lufte, përfshirë ndalim të paligjshëm ose arbitrar, trajtim mizor, torturë dhe vrasje të paligjshme.
