Shefi i grupit parlamentar të Aleancës, Besnik Tahiri ka thënë se kryeministri Albin Kurti ka ardhur në pushtet me kauzën se familjarët janë për t’u ftuar vetëm në ndeja dhe jo për t’i punësuar.
Tahiri në emisionin “Interaktiv” në KTV ka thënë se Kurti ka marrë mbështetje të madhe të popullit mirëpo duke i futur në institucione të pavarura emra të Lëvizjes Vetëvendosje po e tradhton besimin e qytetarëve.
“Për mua është totalisht e papranueshme të vish në pushtet me kauzën se të afërmit, kushërinjt, dajallarët janë për dasma e ndeja e pastaj praktikat nepotike, respektivisht praktikat e punësimit të klientëve partiakë dhe familjarëve me qenë çështje që vetëm tejkalohen. Populli i Kosovës e ka votuar si alternativë, si koncept që e lufton nepotizmin, e lufton punësimin me librezë të partisë. Shihi emrat për ambasadorë, e në institucionet e pavarura, të gjithë emra të partisë. Nuk i ka hije, është tradhti ndaj një besimi të madh popullor”, ka thënë Tahiri.
Tahiri: Qeveria Kurti s'është stabile, deputetët veç kanë nisur kërkesat
Deputeti i Aleancës, Besnik Tahiri, ka vlerësuar se Qeveria e udhëhequr nga Albin Kurti nuk është stabile pavarësisht se i ka 62 deputetë në Kuvend, të cilët e mbështesin.
Sipas tij, mbështetja e ngushtë parlamentare e bën kryeministrin të përballet me kërkesa të vazhdueshme nga deputetët, përfshirë edhe ata të komuniteteve joshumicë, të cilët, sipas Tahirit, po kërkojnë më shumë pozita ministrore.
Duke folur për funksionimin e qeverisë, Tahiri ka thënë se Kurti nuk është në pozitë komode, pasi shumica prej 61 deputetësh nënkupton se secili prej tyre mund të ketë kërkesa të veçanta.
“Kurti nuk është komod. Nuk i ka të gjithë numrat, i ka 61 deputetë, qeverisja me 61 vota është qeverisje me 61 kryeministra, sepse secili e ka nga një kërkesë. Atij veç i kanë filluar kërkesat”, ka deklaruar Tahiri të enjten në “Interaktiv” të KTV-së.
Tahiri ka thënë se Kurti dhe Lëvizja Vetëvendosje duhet ta kuptojnë se për të arritur rezultate të mëdha nevojitet bashkëpunim me partnerë politikë dhe një ekip më i gjerë.
Ai ka kritikuar edhe përbërjen aktuale të kabinetit qeveritar, duke i cilësuar ministrat ndër më të dobëtit.
“Kurti duhet ta kuptojë që për të arritur për të bërë diçka të madhe, duhet bërë me një partner. Nuk po them me Aleancën, nuk po kërkoj koalicion. Ne në fakt kemi pasur qëndrim të prerë. Mendojmë se ky koncept qeverisës se si është tash, me këtë ekip të ministrave, janë ndër ministrat më të dobët”, ka theksuar ai.
Tahiri ka folur edhe për gjendjen e opozitës, duke thënë se nuk është i kënaqur me mënyrën se si po funksionon ajo, as në të kaluarën dhe as gjatë zhvillimeve të fundit politike.
Megjithatë, ai ka shprehur shpresën se Raporti i Progresit mund të shërbejë si një momentum për bashkimin e opozitës.
“Shkelja, përmbysja, mostrajtimi, besimi është papërgjegjësi. Nuk jam i kënaqur se si po funksionon opozita, as nuk kam qenë i kënaqur as në të kaluarën, as nuk kam qenë i kënaqur në shkurt kur është dashur ta themelojmë qeverinë opozita, s’ka ndodhur. Po flas për shkurtin e kaluar. Shkuam në zgjedhje, për çka shkuam në zgjedhje? Ja erdhëm në zgjedhje, është ditur që nuk ndryshon elektorati kaq shpejt. PDK-ja nuk është në situatë të lehtë. LDK-ja i kanë edhe ata tani proceset zgjedhore. Unë po shpresoj që një momentum të mirë e kemi Raportin e Progresit. Ne e kemi diskutuar tri grupet parlamentare dhe besoj që javën e ardhshme do të kemi debat përmbajtësor me 40 nënshkrime dhe kjo është nisja e parë e përbashkimit të opozitës nëse arrijmë të shkojmë me 40 nënshkrime”, është shprehur ai.