Studentët protestuan kundër vlerësimit të Agjencisë së Akreditimit

Studentët e universitetit publik “Haxhi Zeka” në Pejë, të martën, kanë protestuar kundër ekspertes rumune, e cila në cilësinë e ekspertes së jashtme të Agjencisë së Kosovës për Akreditim, ka vlerësuar se universiteti “Haxhi Zeka” nuk i plotëson kriteret për akreditim.

Ky vlerësim ka shkaktuar reagimin e studentëve të këtij universiteti mu ndaj ekspertes rumune, shkruan sot Koha Ditore. 

“Vlerësimi i të ashtuquajturve ekspertë të jashtëm, që për koincidencë rezultojnë të jenë rumunë, shtetas të shtetit i cili nuk e ka njohur Republikën e Kosovës si shtet dhe janë kundër çdo arritjeje të vendit tonë është i papranueshëm, dhe si i tillë do të kundërshtohet ashpër nga studentët e universitetit ‘’Haxhi Zeka’’ në Pejë”, u tha në këtë protestë.

Studentët shprehën besimin e tyre në punën e menaxhmentit të Universitetit, duke përfshirë stafin akademik dhe administrativ, dhe se siç tha Detroit Rrahmani, njëri prej studentëve organizatorë të kësaj proteste, nuk do të lejojnë qe një vlerësim i tillë të marrë formë të vendimit të prerë.

(Artikullin e plotë mund ta lexoni sot në “Koha Ditore”)