Specialja fajëson sigurimin për kravatën, Haxhiu thotë se u shkel dinjiteti i Krasniqit

Ministrja e Drejtësisë, Albulena Haxhiu, i është drejtuar me letër kryetares së Gjykatës Speciale, Ekaterina Trendafilova, duke i shprehur shqetësime për detyrimin e Jakup Krasniqit për ta hequr kravatën para se të hynte në seancë. Në letrën që e ka siguruar KOHA, thuhet se kjo paraqet shkelje të dinjitetit të Krasniqit si i akuzuar pranë kësaj gjykate. Gjykata për rastin e ka fajësuar sigurimin e saj. E avokati Artan Qerkini kërkon që ky rast të hetohet

Detyrimi i të akuzuarit Jakup Krasniqi, që ta heqë kravatën para se të hynte në gjykatore, të hënën, e ka indinjuar opinionin publik në Kosovë, thuhet në letrën e ministres së Drejtësisë, Albulena Haxhiu, drejtuar kryetares së Gjykatës Speciale, Ekaterina Trendafilova, të cilën e ka siguruar KOHA. 

Në letrën e ministres së Drejtësisë thuhet se veprimi i ndërmarrë nga të punësuarit e Gjykatës nuk duhet të tolerohet në asnjë formë, meqë është i pajustifikueshëm dhe e cenon dinjitetin e të akuzuarit. 

“Ky veprim përbën një ndërhyrje të panevojshme dhe të pajustifikueshme në integritetin personal dhe në dinjitetin e z. Krasniqi. Kërkesa për heqjen e kollares është një akt absurd pasi që çdo individ, pavarësisht nga statusi i tij, ka të drejtën për një trajtim të respektuar dhe dinjitoz në gjykatë. Në këtë kontekst, unë kërkoj nga ju që të ndërmerrni hapat e nevojshëm për ta adresuar këtë çështje dhe të siguroni që veprime të tilla të mos tolerohen në asnjë formë në të ardhmen”, thuhet në letrën e Haxhiut.

Dhomat e Specializuara në Hagë nuk e kanë mohuar se arsyeja pse Jakup Krasniqi u detyra ta hiqte kravatën ishte meqë ajo ishte me ngjyrë të kuqe e me shqiponja – si flamuri kombëtar shqiptar. 
Në sqarimin e gjykatës thuhet se sigurimi i gjykatës i ka kërkuar Krasniqit ta heqë kravatën. Pas seancës siç ka njoftuar gjykata kravata i është kthyer, pas konsultimit të sigurimit me zyrtarë të tjerë. 
Por gjykata nuk ka treguar nëse ka nisur procedura disiplinore për këtë rast ndaj sigurimit.

“Para seancës së djeshme, sigurimi i Dhomave të Specializuara të Kosovës i kërkoi zotit Krasniqi ta hiqte kravatën, duke kërkuar sqarim prej shefit të Njësisë së Paraburgimit, lidhur me atë se a lejojnë rregullat e paraburgimit lloje të caktuara veshjeje. Kravata iu kthye zotit Krasniqi dje pasdite dhe shefi i Njësisë së Paraburgimit ka konfirmuar se vendosja e saj është e lejueshme”, thuhet në përgjigjen e Speciales. 

Avokati Artan Qerkini ka vlerësuar se vetëm kryetari i trupit gjykues mund të vendosë për gjëra si heqja e kravatës në gjykatore. 

Qerkini është shprehur se ky është skandal dhe duhet të hetohet prej gjykatës. 

Edhe Arbëri 9 kor 2024 Haxhiu i kërkon masa Speciales: Heqja e kollares së Krasniqit, akt absurd

“Kravata me simbol kombëtar nuk mund të jetë një rekuizitë që fyen gjykatën. Është me të vërtetë skandal i llojit të vet që kryetari i trupit gjykues as nuk ia ka idenë se kush e ka urdhëruar zotin Krasniqi që ta heqë atë kravatë, prandaj mendoj se gjykata duhet urgjentisht të fillojë një hetim kundër atij personi që i ka tejkaluar detyrat e veta zyrtare – e si pasojë e atij tejkalimi një personi i janë fyer ndjenjat kombëtare, siç është në rastin konkret zotit Krasniqi”, ka deklaruar Krasniqi. 

Sipas tij, reagimi i ministres Haxhiu është i drejtë dhe proporcional meqë, siç ka thënë ai, në këtë rast e ka lënduar dinjitetin kombëtar të Krasniqit. 

Në fakt, Krasniqi me këtë kravatë ishte paraqitur në disa seanca, përfshirë edhe në atë fillestare.