Specializantët kanë protestuar të enjten para Shërbimit Klinik Spitalor të Kosovës për shkak se atyre nuk po u paguhen kujdestaritë 24-orëshe dhe puna gjatë festës.
Drejtori i SHSKU-së, Valbon Krasniqi, më 1 korrik e kishte nënshkruar një vendim, sipas të cilit specializantët mbajnë kujdestari vetëm sipas kontratës. Por, për shkak të nevojës në SHSKUK, ata detyrohen të mbajnë kujdestari pa u paguar.
Arianit Zajmi, specializant i neurologjisë dhe njëri ndër përfaqësuesit e Këshillit të Specializantëve ka thënë se ata nuk kanë rrugëdalje tjetër pos që t’i bojkotojnë vendet e tyre të punës.
Madje, ai ka konfirmuar që bojkotimi vendeve të punës ka filluar që disa javë.
“Po, është e vërtetë që në fakt jo disa, por shumica e klinikave e kanë sabotuar kujdestaritë e vikendit dhe kujdestaritë e festave. Kemi ndërmend të vazhdojmë protestat dhe madje ti ndjekim rrugët ligjore ndaj atyre institucioneve të cilat janë përgjegjëse për këtë situatë”, ka thënë ai.
Edhe
Specializantët protestojnë para MSH-së, kërkojnë realizimin e kërkesave të tyre
Zajmi ka bërë të ditur se ata kanë pasur edhe kërcënime që do t’ju hiqet titulli i specializantëve nëse vazhdojnë me greva dhe protesta.
“Praktikisht nuk po zbatohen masa të tilla siç është kjo e fundit që neve po na fyen, po na ofendon, po na diskriminon, dhe nuk po na jep zgjidhje tjetër veçse me i bojkotu kujdestaritë e vendit”, ka treguar Zajmi.
Ai ka bërë të ditur se protesta e tyre do të vazhdojë derisa Ministria nuk i përmbush kërkesat për pagimin e ndërrimeve të tyre.
“Nuk janë duke u paguar pagesat e kujdestarive të vikendit. Ne jemi duke u ballafaquar po them ashtu me një qëndrim mjaft kontradiktorë të krerëve të institucioneve tona, për shkak se kur po vjen puna që ne me i kry shërbimet e shëndetit të popullatës sonë ne po cilësohemi si heronj, si e ardhmja e vendit tonë. Mirëpo, kur po vjen momenti që institucionet tona me i kry obligimet dhe detyrimet e tyre ndaj neve, atëherë ne po harrohemi që ne jemi e ardhmja e këtij vendi”, ka bërë të ditur Zajmi.
Edhe
Specializantët paralajmërojnë ndjekjen e rrugёve ligjore nёse nuk u paguhen kujdestaritё shtesё
Ai ka thënë se kërkesë i kanë dërguar Ministrisë disa herë, por ata janë përgjigjur ose me heshtje, ose duke thënë se nuk ka fonde të mjaftueshme për ta.
Specializantja e kirurgjisë plastike, Amire Demolli, ka rikujtuar se kujdestaritë 24-orëshe konsiderohen si tri ditë pune për shkak se një ndërrim i tyre është 8-orësh.
