Protestohet kundër kërkesës për shtrenjtim të rrymës

Sot në Prishtinë është mbajtur protesta kundër kërkesës KESCO-s për rritje të tarifave të energjisë elektrike. 

Protestuesit nga ndërtesa e KEDS-it ku u mblodhën fillimisht kanë marshuar deri te ndërtesa e Qeverisë.

“Nuk e durojmë ma hajninë”, “Nuk sakrifikojmë na për KEDS-in”,  “Nji popull nuk i nënshtrohet KEDS-it”, “Stop hajnisë me fatura t’rrymës”, “Rryma rritet, populli djeget”, “KEDS-i na len n’terr e na vjedhë”, janë disa nga pankartat që kanë mbajtur në duar. Ato i kanë vendosur në shkallët e ndërtesës së Qeverisë dhe pas kësaj protestuesit janë shpërndarë.

Gjatë kohës sa protestuesit kanë qenë te ndërtesa e KEDS-it kanë hedhur tym të kuq dhe Policia e ka arrestuar një të moshuar që ishte në protestë.

VIDEO:

Protesta është organizuar nga Kolektivi për Mendim dhe Veprim Feminist, në bashkëpunim me organizatën “Përpjekja”. Ajo do të fillojë pranë ndërtesës së KEDS-it dhe pritet të përfundojë te ndërtesa e Qeverisë së Kosovës.

Edhe Arbëri 5 shk 2026 ZRRE-ja alarmon se plani i KEK-ut për investime në termocentrale rrezikon sigurinë e furnizimit

Aktivistja Qendresa Hyseni ka thënë se protesta është mjet për ta parandaluar rritjen prej 21.3 për qind të tarifave të energjisë elektrike, të kërkuar nga KESCO-ja. Ajo ka paralajmëruar se miratimi i kësaj kërkese nga Zyra e Rregullatorit për Energji (ZRRE) do të ketë ndikim në koston e jetës së qytetarëve.

Kundër kërkesës së KESCO-s për rritje të tarifave të energjisë elektrike ka reaguar të enjten edhe Rinia e Partisë Demokratike (PDK), nëpërmjet një aksioni simbolik të zhvilluar para objektit të Ministrisë së Ekonomisë. Me moton “Energjia nuk është luks”, aktivistë të rinisë së PDK-së kanë protestuar duke bartur në duar nga një faturë të rrymës.

Pas shqyrtimit të kërkesës së KESCO-s, ZRRE-ja pritet që në mars të marrë vendim nëse do të ketë rritje të tarifave të rrymës apo jo.