As ka, as që do të ketë Ushtri të Kosovës, deklaroi ministri serb i Mbrojtjes, Aleksandar Vulin. Kështu i tha ai TV Pink, transmeton Koha net.
Siç u shpreh ai themelimin e ushtrisë nuk e lejon as Rezoluta 1244 e KS të OKB, por ajo s’mund të themelohet as në bazë të ligjeve, siç e quan ai, të ashtuquajturës Kosova.
“Sipas ligjeve të tyre (e ka fjalën për Kosovën dhe shqiptarët – sqarim ynë) duhet të jenë 10 për qind serbë për të pasur ushtri. Pse serbi do të shtinte mbi fqinjët e vet, sigurimi i bukës nuk mund të jetë arsye. Serbët në KeM e duan popullin e vet, vendin e vet”, i tha Vulin TV Pink.
Sipas tij politikanët shqiptarë në Prishtinë dështimet e tyre i arsyetojnë me serbët, meqë në Kosovë është niveli më i madh i papunësisë, mjerimit, korrupsionit, citohet të ketë deklaruar ai.
Në pyetjen se si komenton dërgimin nga Mali i Zi të dy oficerëve në radhët e KFOR-it në Kosovë, ministri serb i Mbrojtjes tha se “fqinjët duhet të kenë kujdes për ndjenjat e atyre që jetë pranë tyre, prandaj ka qenë e arsyeshme që Serbia për këtë hap të konsultohej”, transmeton Koha.net.