Shoqata Sindikale e Radio Kosovës dhe Sindikata e Pavarur e RTK-së kanë shprehur shqetësim për gjendjen financiare të transmetuesit publik, pas ekzekutimit të mbi 1 milion eurove nga përmbaruesi për çështjen e emisionit “Milioneri”.
Sipas reagimit të tyre, ky zhvillim e ka futur RTK-në në një situatë alarmante, duke rrezikuar funksionimin normal të institucionit dhe pagat e qindra punëtorëve.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoSindikatat kanë theksuar se RTK-ja tashmë përballet me mungesë të buxhetit për përmbushjen e obligimeve bazë ndaj programit dhe stafit, ndërsa kjo goditje financiare, sipas tyre, vetëm sa e thellon krizën ekzistuese.
“Në një kohë kur RTK-ja tashmë përballet me një buxhet të pamjaftueshëm për të përmbushur obligimet bazë ndaj programit dhe stafit, kjo goditje financiare e thellon edhe më shumë krizën dhe krijon pasiguri të madhe tek punëtorët”, thuhet në reagim.
Ata i kanë bërë thirrje Bordit të RTK-së që urgjentisht të ndërmarrë të gjitha veprimet institucionale dhe ligjore për të garantuar stabilitetin financiar të mediumit publik dhe për të mos lejuar rrezikimin e pagave të punëtorëve.
“Punëtorët e RTK-së nuk duhet të paguajnë çmimin e vendimeve të gabuara menaxheriale apo të problemeve të trashëguara institucionale”, thuhet më tej.
Sindikatat kanë kërkuar gjithashtu transparencë të plotë nga menaxhmenti dhe Bordi i RTK lidhur me hapat që do të ndërmerren për tejkalimin e situatës financiare.