“Shumë të rinj gjilanas kanë kryer studimet në Francë”

Në kuadër të Javës së Europës në Gjilan, kryetari i komunës, Lutfi Haziri, ka pritur sot ambasadorin e Republikës së Francës në Kosovë, Didier Chabert, të cilin e ka informuar për sfidat, problemet, zhvillimin ekonomik, e zbutjen e papunësisë.

Haziri e ka falënderuar ambasadorin Chabert për vizitën dhe mbështetjen e vazhdueshme për Gjilanin.

“Me mbështetjen e Francës, shumë të rinj të Gjilanit kanë kryer studimet atje dhe janë bërë mjekë e ekonomistë shumë të mirë sot. Po ashtu, shumë fëmijë me anomali të lindur janë trajtuar dhe shëruar në spitalet franceze dhe sot mbajnë familjet e tyre”, u shpreh Haziri.

Ndërkaq, ambasadori I Francës në Kosovës, Didier Chabert, , sipas kumtesës, e ka vlerësuar Gjilanin si shembull të zhvillimit ekonomik dhe i zhvillimit agro-industrial.

“Gjilani është një shembull i zhvillimit ekonomik, i zhvillimit agro-industrial të ndërmarrjeve të ndryshme të cilat kanë një impakt në zhvillimin e Kosovës, e po ashtu edhe në eksport e në zhvillimin e industrisë në përgjithësi. Është një komunë, e cila ka shkuar përpara edhe në zhvillimin e infrastrukturës, e gjithashtu është një komunë shembull i bashkëpunimit dhe integrimit të komuniteteve”, citohet të ketë thënë Chabert.