Këshilli Qendror Grevist i SBASHK-ut, ka thënë se është duke u ushtruar presion ndaj kryetarit të sindkatës, Rrahman Jasharaj nëpër disa komuna, shkolla dhe çerdhe, e po ashtu nga ana e Qeverisë.
Këshilli u ka bërë apel prindërve që të heqin dorë nga metoda e tentimit të thyerjes së grevës me presion ndaj grevistësve, sepse siç thuhet, ata nuk do të heqin dorë.
“Presionet janë të vazhdueshme edhe nëpër disa komuna, shkolla dhe çerdhe, si nga ana e Qeverisë - rasti i djeshëm i vizitës së kryeministrit Kurti në Podujevë, ashtu edhe nga një numër i vogël i prindërve me fëmijët e tyre (nxënësit) që tentojnë ta thyejnë grevën. Ju bëjmë apel prindërve që edhe përkundër që numri është i vogël që tentuan me nxënës ta thyejnë grevën me presion ndaj grevistëve, që të heqin dorë nga kjo metodë, sepse në këtë formë në asnjë mënyrë greva nuk mund të ndërpritet. Presionin ta orientojnë drejt Qeverisë duke kërkuar zgjidhje për të filluar punën institucionet arsimore”, thuhet në reagimin e SBASHK-ut.
Këshilli po ashtu ka apeluar tek organet e rendit që t’i përcjellin rastet si ai i ditës së hënë, ndaj kryetarit të SBASHK-ut, Rrahman Jasharaj në shkollën fillore “Ismail Qemali” në Prishtinë.
“Apelojmë te organet e rendit dhe organet tjera që me vëmendje ti përcjellin rastet si ai i djeshmi ndaj kryetarit Jasharaj dhe tentuesit e prishjes se rendit ti vejmë para organeve të drejtësisë, po ashtu edhe nxitësit të cilët me dezinformata të ndryshme nxisin këto sulme”, thuhet në reagim.
Një prind e ka sulmuar fizikisht mësimdhënësin Naim Bytyqin në Shkollën “Ismail Qemali” në Prishtinë të hënën. Përplasja nisi kur prindi shprehu pakënaqësinë ndaj grevës. Ndaj tij reaguan mësimdhënësit e tjerë, që e larguan nga salla.
Para kësaj, kreu i SBASHK-ut, Rrahman Jasharaj, deklaroi se greva nuk ka si të ndalet, pasi Qeveria nuk po takohet me ta.