Sahiti: Shtëpia e të Moshuarve në Prishtinë s’i plotëson kushtet, duhet të rrënohet

Drejtoresha e Mirëqenies Sociale në Komunën e Prishtinës, Adelinë Sahiti, ka thënë se Shtëpia e të Moshuarve në Prishtinë, duhet të rrënohet.

Të enjten në një intervistë në emisionin “Sot” në KTV, Sahiti ka thënë se arkitektët e kanë vlerësuar se ajo nuk i plotëson kushtet.

“Shtëpia e të moshuarve në Prishtinë duhet të rrënohet sepse arkitektët e kanë vlerësuar se objektet ku ndodhen të moshuarit nuk i plotësojnë kushtet. Po mendojmë të ndërtojmë qendër të re”, është shprehur Sahiti.

Ajo ka thënë se që nga rasti i dhunës ndaj të moshuarës në një qendër private të kujdesit për të moshuarit në Pejë, Qeveria e ka kthyer menaxhimin e qendrave për të moshuar në nivel lokal, nga niveli qendror.