Dy mijë qytetarë rrezikojnë të gjobiten pasi refuzuan të regjistroheshin në procesin e regjistrimit të popullsisë. Në Agjencinë e Statistikave kanë njoftuar se janë në fazën e verifikimit final. Ndërsa kanë treguar se 4 ditë para së të mbyllet procesi për regjistrimin e diasporës deri tash janë regjistruar rreth 600 mijë mërgimtar.
Ardona Popova
Nga 50 deri në 2 mijë euro pritet të gjobitën rreth 2 mijë qytetarë që refuzuan të regjistroheshin në procesin e regjistrimit të popullsisë.
Menaxher i regjistrimit të popullsisë në Agjencinë e Statistikave të Kosovës, Yll Shala, thotë se kanë evidenca për ata persona që kanë refuzuar të regjistroheshin.
Regjistruesit kanë pasur për detyrë që tek një familje e cila për here të par ka refuzuar të regjistrohej të shkonin të paktën tri here tek ta për ti bindur që të regjistrohen.
“ Kemi evidenca sepse regjistruesi ka qenë i obliguar të shkoj tri herë dhe secilën herë që ka shkuar e ka lajmërua mbikëqyrësin e tij. Në rast që edhe mbikëqyrësi nuk ka prit as atë ekonomia familjare sepse fillimisht regjistruesi ka qenë i obliguar me lajmëroi mbikëqyrësin pastaj mbikëqyrësi nëse e ka identifikua që ekonomia familjare nuk po pranon atëherë mbikëqyrësi ka qenë i obliguar të lajmëroj komisionin komunal. Komisionet komunale kanë qenë mjaftë aktive andaj edhe nuk ka qenë shumë i madh numri. Njerëzit që punojnë nëpër komuna zakonisht njihen me rrethin e tyre dhe i kanë marrë përsipër këto raste”, tha Shala.
Edhe
Kastrati paralajmëron gjoba ndaj atyre që refuzuan të merrnin pjesë në regjistrim të popullsisë
Shala ka treguar se ASK-ja është në proces të verifikimit të arsyes së refuzimit nga ta.
Ka treguar se pas këtij procesi do të filloj faza e gjobitjes.
Shala ka thënë se personat të cilët kanë qenë jashtë vendit për arsye shëndetësore apo studimore nuk do të gjobiten.
“ASK këtë vit e ka zhvillu procesin e regjistrimit të popullsisë në tërë territorin e Kosovës. Regjistruesit kanë pasur të trokasin në çdo ekonomi familjare, deri në tri herë në një ekonomi familjare që me i marrë informatat për atë familje ekonomike. Po ka pasur raste që ka pas refuzime, i kemi të identifikume të gjitha ato refuzime të cilat komisioni që është këtu në ASK është duke punuar dhe shqyrtuar ato raste. Janë diku 2 mijë raste por nuk janë të gjitha për gjoba, nëse një ekonomi familjare ka refuzuar regjistruesin 3 herë sigurisht që ai e meriton gjobën dhe komisioni merret me atë ekonomi familjare. Por në rastet kur regjistruesi nuk ka hasur në ekonomi familjare, nuk e ka takuar familjen ekonomike apo për arsye të ndryshme ka qenë jashtë vendit ose me studime jashtë ose ndonjë trajtim mjekësor, kjo nuk i përket asaj pjesës së regjistrimit”, tha Shala.
I gjithë procesi i regjistrimit të popullsisë nuk ka përfunduar ende.
Kanë mbetur vetëm edhe disa ditë deri në përfundim të afatit të regjistrimit të popullsisë për diasporë.
Edhe
Sot përfundon procesi i regjistrimit të popullsisë
Sipas Shalës deri tani kanë aplikuar rreth 600 mijë mërgimtar.
Ai ka thënë se të dhënat finale për procesin e regjistrimit të popullsisë i cili ka 5 muaj që ka filluar, do të bëhen publike nga mesi i dhjetorit të këtij viti.
