QKRMT shpreh mbështetjen për të gjitha e viktimat e torturës

Sot, më 26 qershor, në Ditën Ndërkombëtare të Mbështetjes së Viktimave të Torturës, Qendra Kosovare për Rehabilitimin e të Mbijetuarve të Torturës (QKRMT) shpreh solidaritetin dhe mbështetjen për të gjitha viktimat e torturës dhe familjarët e tyre në mbarë botën.

Këtë vit, QKRMT shënon 20 vjetorin e themelimit. Përgjatë gjithë kësaj kohe ajo ishte dhe mbeti zëri më i fuqishëm i viktimave - të mbijetuar të torturës, familjarëve dhe të afërmve të tyre duke iu ndihmuar atyre në përpjekjet për përballimin e dhimbjeve dhe kërkimin e drejtësisë.

Në këtë ditë, QKRMT përmes një komunikate për media dëshiron të theksojë përkushtimin e saj që në bashkëpunim me institucionet vendore dhe ndërkombëtare, partnerët dhe organizatat e shoqërisë civile të trajtojë pasojat e traumës dhe torturës dhe të luftojë të gjitha format e shfaqjes së saj në shoqëri, duke bërë që ky fenomen t’i takojë vetëm të kaluarës tonë.

Deklarata e sivjetshme e Këshillit Ndërkombëtar për Rehabilitimin e të Mbijetuarve të Torturës (International Rehabilitation Council for Torture Victims), i dedikohet migrantëve dhe të gjithë atyre që janë të detyruar të braktisin vendlindjen me qëllim që t’i shmangen torturës, keqtrajtimit dhe diskriminimit, rikujtpn QKRMT.