Ndalohen punimet në vendpunishten në Prizren ku mbetën të lënduar gjashtë punëtorë

Inspektorati Qendror i Punës ka njoftuar për ndalimin e punimeve në vendpunishten në Prizren ku mbetën të lënduar gjashtë punëtorë, pasi u shemb një pllakë betoni.

Sipas Inspektoratit, punimet janë ndaluar në mënyrë që të parandalohen rreziqet dhe të garantohet siguria për shëndetin e punëtorëve.

Ndryshe nga raporti i Policisë, në njoftimin e Inspektoratit thuhet se nga gjashtë të lënduarit, tre vazhdojnë të jenë duke u trajtuar në spital. 

“Sipas informatave të deritanishme, tre nga punëtorët e lënduar vazhdojnë të jenë në spital, ndërsa tre të tjerët janë liruar për trajtim në shtëpi. Njëri nga punëtorët e lënduar ka pësuar fraktura. Pas rastit, Inspektorati Qendror i Punës ka ndaluar punimet në këtë objekt, me qëllim të parandalimit të rreziqeve dhe garantimit të sigurisë dhe shëndetit të punëtorëve në vendin e punës”, thuhet në njoftim.

Paraprakisht në njoftimin e policisë thuhej se njëri prej punëtorëve ka pësuar lëndime më të rënda dhe po e vazhdon trajtimin në spital, ndërsa të tjerët janë liruar.