Pa përfunduar finalizimi i listës së veteranëve dhe kategorizimi i tyre, paga minimale nuk pritet të ketë ndryshime.
Megjithëse Këshilli Ekonomik Social kishte marrë vendimin që paga minimale të rritet nga 130 dhe 170 në 250, Ministria e Financave ende nuk ka vendosur për këtë propozim, raporton KTV.
Kjo Ministri i ka thënë KTV-së se një prej ndikimeve negative në situatën aktuale është Ligji për Veteranët, për arsye se derisa të ndodhë plotësim-ndryshimi i tij, vlejnë dispozitat e ligjit bazik.
Ligji bazik specifikon qartë se paga e veteranëve nuk mund të jetë më e vogël se paga minimale.
Faktor tjetër, Ministria përmend edhe qëndrimin e FMN-së dhe ndikimin tek investitorët e huaj.
Mirëpo, qëndrim krejt tjetër ka ministri i Punës dhe i Mirëqenies Sociale, Skënder Reçica.
Edhe
Ligji për Veteranët pengon rritjen e pagës minimale në 250 euro për sektorin privat
Ai insiston se vendimi i marrë në Këshillin Ekonomik Social erdhi pas një varg analizash dhe se i njëjti nuk bie ndesh me asnjë proces tjetër.
Ndërsa, Bashkimi i Sindikatave të Pavarura të Kosovës shqetësohet rreth kontrollit të bizneseve nëse të njëjtat do t’i respektojnë vendimet e institucioneve.
Në një publikim të fundit të FMN-së, ky institucion ka kërkuar përmirësimin e konkurrencës dhe politika të matura në të ardhurat, duke rekomanduar që çdo rritje e pagës minimale të jetë në përputhje me mekanizmin aktual të përcaktimit të pagës minimale.
