Qeveria mban mbledhjen e parë

Kurti: Që nga nesër, i gatshëm të diskutoj me partitë e tjera për presidentin

Photo: Driton Paçarada

Kryeministri Albin Kurti ka deklaruar se është i gatshëm të nisë diskutimet me subjektet e tjera politike për çështjen e zgjedhjes së presidentit, menjëherë pas përfundimit të disa proceseve prioritare në Kuvend.

Kuvendi e ka obligim ta zgjedhë presidentin deri më 4 mars, një muaj para se Vjosa Osmanit t’i përfundojë mandatit.

Ai theksoi se pas konstituimit të Kuvendit dhe zgjedhjes së Qeverisë, vendi ndodhet në fazën e tretë institucionale, që përfshin votimin e buxhetit për vitin 2026 dhe miratimin e marrëveshjeve ndërkombëtare.

“E pas konstituimit të Kuvendit dhe zgjedhjes së Qeverisë mbrëmë, tash jemi në hapin e tretë, votimi i buxhetit 2026 dhe i marrëveshjeve ndërkombëtare. Porsa të përfundohen këto, jam i gatshëm që nga nesër të fillojmë kontaktet dhe diskutimet me subjektet tjera politike për çështjen e Presidentit”, ka deklaruar Kurti.

Qeveria po përpiqet që të aranzhojë sot një seancë ku do të votohej buxheti e marrëveshjet ndërkombëtare.

Qeveria procedon në Kuvend buxhetin për vitin 2026

Photo: Driton Paçarada

Qeveria e Kosovës në mbledhjen e parë ka proceduar në Kuvend projektligjin për buxhetin e vitit 2026. 

Kryeministri Albin Kurti ka thënë se vlera e buxhetit është 4 miliardë euro.

“Sot po e riprocedojmë në Kuvend edhe projektligjin për buxhetin e viti 2026 të cilin e patëm miratuar në mbledhjen e 31 tetorit të vitit të kaluar. Është buxhet në vlerë prej 4 miliardë eurosh, ku për komunat e Kosovës parashihen 867 milionë euro”, është shprehur Kurti.

Ai ka thënë se ky buxhet e përmban edhe pagën e 13-të për punëtorët e sektorit publik që paguhen nga buxheti dhe e cila sipas tij, do të paguhet sapo të hyjë në fuqi buxheti. 

Kurti ka thënë se buxheti përmban edhe vlerën që mundëson rritjen e shtesës për 15 vjetët e para të përvojës së punës. 

Ndërkohë ministri i financave Hekuran Murati ka thënë se në vlerën prej 4 miliardë euoshe, të hyra buxhetore janë 3.64 miliardë euro. Pjesa tjetër ka thënë se financohet nga huamarrjet dhe metodat e tjera të deficitit. 

Murati ka thënë se për shkak të ndryshimit të dikastereve do të nevojitet një rishikim, por se për shkak të urgjencës ai to të procedohet në Kuvend dhe pastaj do të rishikohet.    

Qeveria ka miratuar po ashtu kërkesën për zgjatjet buxhetore edhe për muajin mars. 

Qeveria miraton marrëveshjen në vlerë 90 milionë euroshe të Bankës Botërore

Ministri i Financave, Hekuran Murati, ka shpalosur në mbledhje detajet e marrëveshjaes

Photo: Driton Paçarada

Kabineti qeveritar ka miratuar Projektligjin për Ratifikimin e Marrëveshjes së Financimit për Programin e Parë për “Financimin e Politikave Zhvillimore për Efektivitetin Fiskal, Konkurrushmërinë dhe Rritjen e Gjelbër” mes Kosovës dhe Asociacionit Ndërkombëtar për Zhvillim (pjesë e Bankës Botërore).

Ministri i Financave, Hekuran Murati, ka thënë se marrëveshja ka vlerë totale prek 90.3 milionë euro.

“Periudha e kthimit është 12 vjet, norma e interesin zero për qind. Konsideruar rëndësinë e marrëveshjes dhe kushtet e mira financiare ju ftoj ta miratojmë për yta proceduar në Kuvend për ratifikim”, ka thënë ai.  

Marrëveshja tani pritet të shkojë në Kuvend për t'u ratifikuar. 

E premtja e 13 shkurtit është dita e fundit kur Kuvendi i Kosovës ka kohë të ratifikojë marrëveshjen  me Bankën Botërore në vlerë prej 90.3 milionë eurosh.

Kabineti qeveritar ka votuar pro edhe disa marrëveshjeve të tjera.

Janë miratuar dhe proceduar tutje në Kuvend: Projektligji për Ratifikimin e Marrëveshjes mes Kosovës dhe BE-së mbi Aranzhimet për zbatimin e përkrahjes së Unionit për Kosovën në kuadër të Instrumentit për Reforma dhe Rritje; Projektligji për Ratifikimin e Marrëveshjes së Kredisë për “Instrumentin për Reforma dhe Rritje për Ballkanin Perëndimor” mes Kosovës dhe BE-së; Projektligji për Ratifikimin e Marrëveshjes së Kredisë mes Kosovës e përfaqësuar nga Ministria e Financave dhe Asociacionit ndërkombëtar për Zhvillim për Projektin KOMPAS – Qasja Gjithëpërfshirëse e Kosovës për Forcimin e Sistemit të Shëndetësisë; si dhe Projektligji për Ratifikimin e Marrëveshjes së Kredisë mes Kosovës e përfaqësuar nga Ministria e Financave dhe Asociacionit Ndërkombëtar për Zhvillim për Projektin “Edukimi në Fëmijërinë e Hershme dhe Kujdesi për Kapitalin Njerëzor të Kosovës.

Kurti: Kabineti i ri qeveritar i ka parakushtet të jetë më i suksesshmi në historinë e Kosovës

Photo: Driton Paçarada

Kryeministri Albin Kurti ka mbajtur fjalimin hyrës në mbledhjen e parë të Qeverisë “Kurti 3” të enjten, duke theksuar se kabineti i zgjedhur prej tij ka potencialin të jetë më i suksesshmi në historinë e re të Kosovës.

Ai u tha ministrave se shërbimi ndaj Republikës dhe qytetarëve është privilegj dhe përgjegjësi që duhet ushtruar me nder dhe përkushtim.

“Shërbimi ndaj Republikës dhe qytetarëve me nder dhe përkushtim është privilegji që e keni dhe që do ta gëzoni nga ulëset. Mësimet që kemi nxjerrë nga mandati i kaluar dhe përvojën që kemi fituar, së bashku me ekspertizën dhe dijet tuaja profesionale, më bëjnë të besoj se ky kabinet i ka parakushtet të jetë kabineti më i suksesshëm në historinë e re të Kosovës, që shumë shpejt i mbush 18 vjet”, ka deklaruar Kurti.

Kryeministri shtoi se pritjet e qytetarëve ndaj Qeverisë janë të larta dhe përbëjnë standardin që vetë ekzekutivi ka vendosur gjatë mandatit të kaluar.

“Pritjet që qytetarët kanë nga ne janë dëshmi e vetë standardit që e kemi vendosur ne dhe që duhet ta nderojmë e ta përmbushim”, theksoi ai.

Kabineti i ri:

-Zëvendëskryeministër i parë dhe ministër i Punëve të Jashtme dhe Diasporës, Glauk Konjufca;

-Zëvendëskryeministre e dytë dhe ministre e Drejtësisë, Donika Gërvalla;

-Zëvendëskryeministër i tretë për çështje të pakicave dhe bashkëpunim, Fikrim Damka;

-Ministër i Financave, Hekuran Murati;

-Ministër për Punë, Familje dhe Vlerat e Luftës Çlirimtare, Andin Hoti;

-Ministër i Mbrojtjes, Ejup Maqedonci,

-Ministër i Punëve të Brendshme, Xhelal Sveçla,

-Ministër i Digjitalizimit dhe Administratës Publike, Lulëzon Jagxhiu;

-Ministër i Shëndetësisë, Arben Vitia;

-Ministër i Arsimit dhe Shkencës, Hajrulla Çeku;

-Ministre e Kulturës dhe Turizmit, Saranda Bogujevci;

-Ministër i Administrimit të Pushtetit Lokal, Elbert Krasniqi;

-Ministër i Sportit dhe Rinisë, Blerim Gashani; 

-Ministre e Mjedisit dhe Planifikimit Hapësinor, Fitore Pacolli;

-Ministër i Bujqësisë, Pylltarisë dhe Zhvillimit Rural, Armend Muja;

-Ministër i Infrastrukturës dhe Transportit, Dimal Basha;

-Ministre e Industrisë, Ndërmarrësisë, Tregtisë dhe Inovacionit, Mimoza Kusari;

-Ministre e Ekonomisë, Artane Rizvanolli;

-Ministër për Komunitete dhe Kthim, Nenad Rashiq;

-Ministër për Zhvillim Rajonal, Rasim Demiri.