Projektet e mërgimtarëve përkrahen nga Komuna e Lipjanit

Nasri Bajqinca nga fshati Rubovc i Komunës së Lipjanit është njëri nga mërgimtarët që vitet e fundit ka ndërmarrë disa nisma për t’i ndihmuar banorët në vendlindjen e tij.

Së bashku me mërgimtarët e tjerë që jetojnë në shtetet perëndimore, ai ka finalizuar një objekt për kryerjen e riteve të varrimit në fshat.

Investime kanë bërë edhe brenda xhamisë së Rubovcit.

Nismë e tyre ishte edhe ajo për gjelbërimin e fshatit, midis të tjerash.

E projektet e tyre po përkrahen edhe nga Komuna e Lipjanit me participim.

Bajqinca thotë se mërgimtarët së shpejti do të organizohen edhe për ta punësuar një bashkëfshatar për mirëmbajtjen e hapësirave gjelbëruese të fshatit.

“Kontributi jonë çdo njëri mërgimtar e ka të obliguar t’i japë 120 euro në vit dhe e kemi marrë këtë iniciativë për ta ndërtuar sallën e fshatit për të pame, pastaj i kemi edhe disa iniciativa të tjera për të ardhmen që ta bëjmë gjelbërimin e fshatit, varrezat t’i ndërtojmë, një fushë sportive”, ka thënë Bajqinca.

Ndërkohë, Hyra Bytyqi, zëdhënëse e Komunës së Lipjanit, e ka quajtur shembull të mirë investimin e tyre në vendlindje, teksa ka shtuar se për ndërtimin e këtij objekti në Rubovc ka participuar edhe Komuna pas iniciativës së mërgimtarëve.

Sipas saj, Komuna nga buxheti i saj ka realizuar edhe projekte të tjera vetjake.

“Në Rubovc janë bërë disa investime, është ndërtuar kanalizimi, shkolla e re fillore, gjithashtu është në ndërtim e sipër edhe ndriçimi dhe trotuari në rrugët kryesore të fshatit. Gjithashtu në të ardhmen planifikohet të ndërtohet edhe shtegu për biçikleta”, ka thënë ajo.

Sipas zëdhënëses Bytyqi, përveç këtyre investimeve, Komuna planifikon edhe rindërtimin e rrugës ekzistuese Lipjan-Rubovc, sipas standardeve, përfshirë trotuaret e ndriçimin publik.