Policia e Kosovës ka thënë se të premten nuk ka pasur ndonjë eskalim gjatë defilimit të maturantëve në Mitrovicë të Veriut.
Gjatë ditës, politikani serb, Aleksander Arsenijeviq, publikoi një video në të cilën shihet intervenimi i Policisë së Kosovës në këtë defilim të maturantëve. Aty një polic shihet tek ndërhyn te një i ri dhe dëgjohet tek i thotë të mos ketë provokime. Në pamje shihet edhe një person që bën shqiponjën. Policia megjithatë ka vlerësuar se aktiviteti ka përfunduar qetë dhe pa probleme.
“Policia e Kosovës, stacioni në Mitrovicë të Veriut, dëshiron të sqaroj për opinionin publik që një pjesë e raportimeve për ‘protestë’ dhe ‘eskalim’ në Mitrovicë të Veriut janë të pavërteta dhe të pasakta. Aktiviteti të cilit i referohen këto raportime nuk kanë të bëjë as me protestë e aq më pak me ndonjë eskalim. Aktiviteti në fjalë është defilim i maturantëve të Komunës së Mitrovicës së Veriut, të cilin paraprakisht ata e kanë njoftuar në Policinë e Kosovës. Me rastin e raportimit dhe njoftimit Policia e Kosovës është përkujdesur për mbarëvajtjen dhe kujdesin për këtë aktivitet, i cili ka përfunduar qetë dhe pa ndonjë problem”, thuhet në reagim të Policisë. “Gjatë festimit të maturës kanë ndodhur disa provokime dhe me qëllim evitimin e ndonjë përshkallëzimi Policia ka reaguar. Situata është qetësuar dhe maturantët kanë vazhduar festën e tyre pa pasur nevojë për reagim shtesë”.
Për rastin kanë reaguar organizata të shoqërisë civile në veri të cilat kanë kërkuar masa ndaj policit që shihet në video.
E shefi i misionit të EULEX-it, Giovanni Pietro Barbano, ka shkruar në Twitter se është i shokuar dhe se e dënon “përdorimin e tepruar të forcës nga polici i Kosovës ndaj një të riu në Mitrovicën e Veriut”.
“Ia kam shprehur shqetësimet e mia udhëheqjes së Policisë së Kosovës dhe jam i bindur se ata që janë përgjegjës për këtë akt të papranueshëm do të mbahen përgjegjës në përputhje me sundimin e ligjit”, ka shkruar ai.
Sveçla publikon videon, në manifestimin e maturantëve në veri pati thirrje anti-Kosovë
Ministri në detyrë i Punëve të Brendshme, Xhelal Sveçla, ka publikuar një video në të cilën shihen disa persona tek kanë bërë thirrjen shoviniste “Kosova është zemra e Serbisë” gjatë manifestimit të maturantëve në Mitrovicë të Veriut të premten.
Gjatë ditës, politikani serb, Aleksander Arsenijeviq, publikoi një video në të cilën shihet intervenimi i Policisë së Kosovës në këtë defilim të maturantëve. Aty një polic u pa tek ndërhyn te një i ri dhe dëgjohet tek i thotë të mos ketë provokime. Në pamje shihet edhe një person që bën shqiponjën. Policia megjithatë ka vlerësuar se aktiviteti ka përfunduar qetë dhe pa probleme.
E në veri dhe në Beogradin zyrtar pati reagime duke e cilësuar incident ndëretnik dhe të tepruar forcën e ushtruar nga Policia e Kosovës. Të tepruar e konsideroi këtë forcë edhe shefi i EULEX-it.
Ndërkaq, Sveçla ka thënë se pos kësaj thirrjeje, në manifestim ka pasur edhe simbol të tre gishtave. Ai ka thënë se Policia ka ndërmarrë të gjitha veprimet e nevojshme për të evituar përshkallëzimin.
“Të gjithë qytetarët e Republikës së Kosovës gëzojnë të drejtën e organizimit dhe manifestimit në hapësira publike dhe veçanërisht kur ato njoftohen në organet e rendit. I tillë ishte edhe manifestimi i sotëm i maturantëve në Mitrovicën e veriut. Pas njoftimit, Policia e Kosovës ka ndërmarrë të gjitha hapat që sigurojnë mbarëvajtje të plotë të këtij manifestimi. Gjatë manifestimit, disa pjesëmarrës kanë filluar provokimet ndaj qytetarëve të pranishëm në shesh me simbole nacionaliste dhe thirrje shoviniste ‘Kosova është zemra e Serbisë’ dhe me simbolin e tre gishtave që jo vetëm përkujtojnë spastrimin etnik dhe gjenocidin që Serbia ka kryer në Kosovë, por manifestojnë edhe pretendimet që ky shtet ka ndaj Republikës sonë”, ka shkruar Sveçla në Facebook.
Ai ka thënë se aktet e ngjashme burimin e kanë te regjimi autokrat dhe prorus i Vuçiqit. Sveçla ka bërë thirrje që qytetarët të mos bien pre e provokimeve.
“Ju bëj thirrje të gjithë qytetarëve pa dallim të mos bien në provokime të ngjajshme si dhe apeloj të mos instrumentalizohen nga Beogradi zyrtar dhe kryekrimineli Radoiçiq që duan eskalim dhe destabilizim të situatës në Kosovë”, ka shtuar Sveçla.
