-
Nga:
Jehona Gjinovci
- 25 shtator 2026 14:56
- Shpërndaje në:
Në Kuvendin Komunal të Prishtinës po diskutohet Rregullorja për Tarifa e kryeqytetit, e cila përfshin edhe vendosjen e tarifës prej 2 eurosh për veturat që futen brenda zonës “Qendër”.
Partia Demokratike e Kosovës ka deklaruar se nuk e mbështet vendosjen e tarifës dhe ka kërkuar ndryshimin e rregullores.
Drejtori i Zhvillimit Ekonomik dhe Inovacionit në Komunën e Prishtinës, Luftar Braha, e ka mbrojtur propozimin për vendosjen e taksës duke thënë se këtë kufizim e kanë bërë 600 qytete në botë, duke marre si shembull kryeqytetin e Sllovenisë e Shqipërisë.
Po ashtu ai theksoi se veturat mund të kenë qasje në parkingun e Pallatit të Rinisë pa u tarifuar.
Nexhmije Gjema në emër të Vetëvendosjes po ashtu kundërshtoi këtë tarifë. Ajo theksoi se krijimi i një zone të tillë “e ngulfat edhe më shumë qytetin”.
“Nëse automjetet nuk lejohen të kalojnë nëpër këtë zonë, do të gjejnë rrugë alternative dhe kështu do të rritet edhe më shume ndotja e ajrit sepse do te krijohet më shume tollovi e kësisoj do të qëndrojnë makinat më shumë ndezur”, ka thënë ajo.
Arbenita Murseli nga Lidhja për Prishtinën propozoi që targat e qytetit të Prishtinës të ndërrohen nga 01 me numrin identifikues 10. Kësisoj, sipas saj, do të mund të identifikoheshin saktë banorët e Prishtinës nga ata të komunave përreth që mbajnë numrin 01 dhe nuk do të kishte nevojë për kufizime për banorët e Prishtinës.