Pajisje mjekësore të falsifikuara, mes mallrave që u synua të kontrabandohen

Në pikat kufitare të Kosovës janë ndalur mallra të dyshuara për falsifikim. Mes tyre, edhe pajisje që përdoren nga pacientët me diabet, aparate që matin nivelin e sheqerit në gjak. Në Doganë thanë se tentativat për t’i futur në treg janë shtuar, ndërsa në organizatat për mbrojtjen e pacientëve paralajmërojnë për rrezikun në shëndet që këto pajisje sjellin

Produktet dhe pajisjet mjekësore janë në mesin e mallrave të falsifikuara që është tentuar të futen në Kosovë.

Përfaqësues të Doganës bënë të ditur për këtë dhe, ndonëse nuk treguan sasinë, konfirmuan se në mallrat e konfiskuara përfshihen edhe pajisje të përdorura nga pacientët me diabet, përfshirë aparate për matjen e nivelit të sheqerit në gjak.

Udhëheqësja e sektorit për të drejtat e pronës intelektuale, Sadije Topojani, tha se Dogana ka parandaluar disa tentativa kontrabandimi të këtyre pajisjeve mjekësore.

“Kemi edhe pajisje mjekësore të cilat kanë rezultuar si të falsifikuara. Këto pajisje kanë qenë, janë preparate për matjen e glukozës në gjak, është jashtëzakonisht e dhimbshme në qoftë se e sheh një pajisje të tillë që rezulton si e falsifikuar”, ka thënë ajo.

Topojani tha se ndalja e këtyre pajisjeve bëhet falë sinjalizimeve të marra nga zotëruesit e markave.

“Është një numër goxha i madh i tyre, ka pasur dy tre raste që i kemi pasë ... ka qenë një import goxha i madh”, ka bërë të ditur kjo zyrtare doganore.

E, në Shoqatën e të Prekurve me Diabet në Pejë theksojnë se tregu është i mbushur me aparate jocilësore për matjen e glikemisë.

Idriz Ethemi është kryetar i shoqatës, dhe paralajmëron për rrezikun nga pajisje të tilla.

“Japin rezultatin e gabuar. Leja që është glikemia e ngritur te pacientët, atëherë normal që e detyron pacientin që të përdorë për shembull insulinën, e merr insulinën më tepër se që ka nevojë apo e merr insulinën pa pasë nevojë fare, duke ‘iu falënderuar’ këtyre gabimeve që bëjnë faktikisht aparate pa kualitet të cilët po hyjnë në tregun tonë”, ka thënë Ethemi.

Sipas Ethemit, pajisjet e falsifikuara zakonisht shiten me çmim më të ulët, dhe kjo bën që pacientët t’i blejnë para atyre origjinale. Ai kërkon nga institucionet që t’i sigurojnë falas.

“Deri tani nuk kanë dhënë falas asnjë institucion aparate për pacientët. Ne në shoqatën tonë i kemi dhuruar diku 2 mijë e 500 aparate, por normal ato aparate kanë qenë jo vetëm të kontrolluara dhe kanë kualitetin normal shumë më të lartë”, ka thënë ai.

Sipas të dhënave të Doganës, vetëm gjatë këtij viti janë konfiskuar produkte me vlerë mbi 14 milionë euro, që përfshijnë të gjitha mallrat që është tentuar të futen në tregun kosovar.