Presidentja Vjosa Osmani ka njoftuar të ngarkuarën me punë të ambasadës së Shteteve të Bashkuara të Amerikës në Kosovë, Anu Prattipati, për tendencat e vazhdueshme të Serbisë për destabilizimin e Kosovës.
Siç ka njoftuar Presidenca, në një takim të hënën, Osmani e Prattipati diskutuan për arrestimin e qytetarëve serbë në Gjakovë e në Prizren, që pretendonin se ndodheshin në pelegrinazh.
“Duke folur për situatën e sigurisë dhe zhvillimet në këtë sferë, Presidentja Osmani theksoi tendencat e vazhdueshme të Serbisë për destabilizimin e Kosovës dhe të të gjithë rajonit përmes veprimeve të mirëkoordinuara me struktura ilegale dhe banda kriminale serbe. Presidentja Osmani diskutoi me znj. Prattipati për arrestimin e djeshëm të qytetarëve serbë në Gjakovë dhe në Prizren, të cilët pretendonin se ndodheshin në pelegrinazh. Porse, hetimet e deritashme kanë treguar se këto grupe kishin ndërlidhje me strukturat e inteligjencës ushtarake serbe si dhe me anëtarë të grupit terrorist të Banjskës”, thuhet në njoftim.
Osmani e ka cilësuar këtë veprim si “pjesë të një përpjekjeje të vazhdueshme nga Serbia për destabilizimin e Kosovës, përmes kërcënimeve dhe dhunës”.
Osmani ka thënë se kjo përbën ndërhyrje të papranueshme në sovranitetin shtetëror të Republikës së Kosovës.
Edhe
Osmani takohet me Pratipattin, diskutohen zhvillimet e fundit politike në vend
Presidentja ka shtuar se Kosova nuk do të tolerojë asnjë ndërhyrje që rrezikon paqen, rendin kushtetues dhe sigurinë e të gjithë qytetarëve të saj, pa dallim përkatësie.
Osmani dhe Prattipati kanë diskutuar edhe për thellim të aleancës strategjike me SHBA-në.
