Osmani e Prattipati diskutojnë për masën e përkohshme të Kushtetueses

Presidentja Vjosa Osmani dhe e ngarkuara me punë në Ambasadën e Shteteve të Bashkuara të Amerikës në Kosovë, Anu Prattipati, kanë diskutuar të enjten për rëndësinë e respektimit të masës së përkohshme të Gjykatës Kushtetuese për seancën konstituive të Kuvendit dhe për pritjen e aktgjykimit final.

Sipas një njoftimi të Presidencës së Kosovës, në takim Osmani e Prattipati kanë diskutuar edhe për rëndësinë e funksionalizimit të të gjitha institucioneve dhe për zhvillimet e fundit në vend.

Në 24-vjetorin e sulmeve terroriste të 11 shtatorit 2001 në SHBA, Osmani ka thënë se Kosova qëndron përgjithmonë me popullin amerikan, në mbrojtje të paqes dhe për të ardhmen më të mirë për brezat që vijnë.

Është diskutuar edhe për aktivitetet që do të realizohen gjatë Javës së nivelit të lartë të Asamblesë së Kombeve të Bashkuara.

Ditë më parë Gjykata Kushtetuese vendosi masë të përkohshme përmes së cilës ua ka ndaluar deputetëve të ndërmarrin veprime si dhe ka ndaluar zhvillimin e ndonjë procedure për formimin e Qeverisë së re të Kosovës. Masa është vendosur në mënyrë ex officio dhe në bazë të kërkesës së deputetëve të Listës Serbe. Në fund të gushtit Kuvendi i Kosovës ka zgjedhur kryetarin dhe katër nga pesë nënkryetarët, duke ndarë votimin e nënkryetarëve nga komunitetet joshumicë. Votat e mjaftueshme nuk i ka marrë asnjë nga deputetët e komunitetit serb për nënkryetar të Kuvendit e kryetari i ri Dimal Basha e ka shpallur institucionin të konstituuar. Pas këtij vendimi subjekti më i madh politik i serbëve në Kosovë, Lista Serbe, i është drejtuar Gjykatës Kushtetuese me pretendimin se me vendimin e Bashës është shkelur Kushtetuta me ndarjen e votimit të nënkryetarëve nga komunitetet pakicë.