Osmani kujton heroin Sali Çekaj në 24-vjetorin e rënies së tij

Presidentja Vjosa Osmani, e ka kujtuar heroi Sali Çekaj në 24-vjetorin e rënies së tij. Osmani ka shkruar se komandant Sali Çekaj ishte njëri ndër strategët më të shquar të luftës e veprimtar i paepur në përpjekjet e popullit të Kosovës për liri

“24 vjet më parë ra heroikisht njëri ndër komandantët më të shquar të Ushtrisë Çlirimtare të Kosovës, heroi i kombit, Sali Çekaj. Ai ra në fushëbetejën e Koshares, njërën ndër betejat vendimtare jo vetëm për ta thyer kufirin e egër që i ndante shqiptarët, por edhe mitin e rremë për pathyeshmërinë e forcave serbe”, Citohet Osmani në shkrimin e Presidencës në Facebook.

Osmani ka thënë se Çekaj veprimtarinë atdhetare e nisi herët, për të mos iu ndarë deri në rënien e tij heroike, më 19 prill 1999.

“Njëherë në Kosovë e më pas në mërgim, ai dëshmoi se si punohet e vdiset për atdhe. Së bashku me Agim Ramadanin e bashkëluftëtarë të tjerë, Saliu iu bashkua Ushtrisë Çlirimtare të Kosovës, ku u shqua si strateg ushtarak. Si komandant i Brigadës 134, la gjurmë të pashlyera në organizimin e UÇK-së dhe të betejave të saj për liri. I përjetshëm kujtimi për të!”, citohet të ketë thënë Osmani