Nis aksioni i lirimit të hapësirave të gjelbra në lagjen “Ortakoll” të Prizrenit

Nëpërmjet Inspektoratit, Komuna e Prizrenit ka filluar të enjten aksionin për lirimin e hapësirave të gjelbra në lagjen “Ortakoll”, të cilat prej kohësh shfrytëzohen në mënyrë të paautorizuar. Disa gastronomë janë ankuar se nuk ka barazi në trajtim të bizneseve. E zyrtarët komunalë kanë theksuar se aksioni do të zbatohet deri në lirimin e të gjitha hapësirave të gjelbra

Drejtoria e Inspektoratit e Komunës së Prizrenit të enjten ka ndërmarrë veprime për lirimin e hapësirave të gjelbra në lagjen “Ortakoll”, të cilat prej kohësh janë shfrytëzuar në mënyrë të paautorizuar.

Zyrtarët e këtij dikasteri kanë theksuar se aksioni do të zbatohet deri në lirimin e të gjitha hapësirave të gjelbra. Por në mesin e gastronomëve që veprojnë në këtë lagje janë adresuar shqetësime se organet komunale po aplikojnë standarde të dyfishta lidhur me lirimin e hapësirave publike.

Gastronomi Mahmut Sezer është ankuar rreth sjelljes së inspektorëve komunalë. Ai ka theksuar se tavolinat dhe karriget i ka larguar nga hapësira e gjelbër sipas afatit të përcaktuar dhe ka shtuar se të enjten pa nevojë i janë shkatërruar lulet nga Inspektorati. Njëherësh ka kërkuar trajtim të barabartë për të gjithë operatorët ekonomikë.

“Nëse ka një rregull, unë i pari e zbatoj, s'ka problem. Por derisa unë e zbatoj rregullin, X kafeja nuk e zbaton. Përse prej meje kërkohet lirimi i hapësirës së gjelbër, ndërsa në X kafenenë nuk bëhet e njëjta. Ky është shqetësimi im. Shteti ka të drejtë dhe nuk kemi ankesë, por rregulli a vlen vetëm për këtë kafene, apo për të gjitha kafenetë. Këtë dua ta mësoj nga zyrtarët”, ka thënë afaristi nga Turqia.

Rahim Destani, udhëheqës i sektorit për inspektime komunale, ka bërë të ditur se aksioni ka për qëllim lirimin e hapësirave publike në lagjen “Ortakoll” nga pengesat e ndryshme dhe se do të zhvillohet në tërë lagjen. Ai ka thënë se nga bizneset është kërkuar që këto hapësira të lirohen deri më datën 12 korrik.

“Mirëpo edhe dy ditë ne i kemi njoftuar dhe kemi kërkuar përsëri që t’i largojnë vullnetarisht. Ata që nuk dëgjojnë, nuk i largojnë vullnetarisht, atëherë Inspektorati është i detyruar që përmes operatorit ekonomik të kontraktuar nga Komuna e Prizrenit ta bëjnë largimin e këtyre pengesave që janë të vendosura në hapësirat publike”, ka deklaruar zyrtari komunal.

Komuna e Prizrenit është në proces të krijimit të një rregulloreje për mënyrën e shfrytëzimit të hapësirës publike në qytet dhe në Zonën Historike, me të cilën do të përcaktohen kriteret themelore për lejimin e vendosjes së objekteve të përkohshme në sipërfaqet publike, si dhe tarifat përkatëse.