-
Nga:
Ilir Osmanaj
- 24 nëntor 2020 16:44
- Shpërndaje në:
Në vendin ku ishte vendosur të hënën nga institucionet komunale, një balonë me ajër me logon e komunës dhe me mbishkrim “Komuna e Pejës, Mirë Se Vini”, ka mbetur vetëm hiri i balonës.
Balona kishte marrë flakë të hënën në orët e mbrëmjes dhe ishte djegur e tëra. Ende s’dihen shkaqet që çuan në djegien e saj.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo
“Me datën 23 nëntor rreth orës 22.00 policia është informuar për një zjarr në rrugën ‘Zahir Pajaziti’. Me të marrë informacionin njësitet policore kanë dal në vendin e ngjarjes, ku kanë dal edhe ekipi i zjarrfikësve dhe eksperti i zjarrit. Rasti është duke u hetuar”, ka thënë për KOHËN, zëdhënësi i policisë së Pejës, Driton Rugova.
Kjo balonë ishte vendosur në hyrje të qytetit të Pejës nga drejtimi i Prishtinës.
Vendosja e saj, me ngjyrat në formë horizontale kaltër, bardhë dhe kuq, kishte nxitur reagim të qytetarëve e opozitës. Sipas tyre, ngjyrat ngjanin në flamurin e ish-Jugosllavisë. Reshat Nurboja nga Alternativa e ka quajtur provokues e baltosës të ndjenjave kombëtare të qytetarëve të Pejës, balonën e komunës.
“Ishte karikaturë e shëmtuar, e cila nuk simbolizonte asgjë të përbashkët me Pejën e Kosovën. Dhe kështu, ky regjim naiv e i paditur i kësaj qeverie të Komunës së Pejës, Kosovës i ka krijuar ndoshta ndonjë problem, pa nevojë, diplomatik, që sigurisht forcat antishqiptare do të mundohen ta përdorin për ta kritikuar Kosovën në jo pak takime zyrtare e jozyrtare ndërkombëtare”, u shpreh ai.
I ashpër ishte edhe reagimi i përfaqësuesve të shoqërisë civile në Pejë.
“Njerëzit që jetojnë e vijnë në Pejë, nuk vijnë për Gazmend Muhaxherin. Ata vijnë se e duan qytetin dhe çdo paqartësi apo irritim për qytetarin mund të përfundojë ne veprime të tilla si ishte rasti me balonën mirëseardhëse. Një balonë, Pejën akoma nuk e bën qytet të balonave, as si simbolikë, e lëre me më simbolika e ngjyra të keqkombinuara e irrituese nga një e kaluar e vështirë që kanë përjetuar qytetarët. Pra, Muhaxheri duhet të ketë kujdes, të konsultohet paraprakisht me qytetarin për veprimet, e jo të veprojë kokë në vete”, ka thënë Veton Mujaj, drejtor i OJQ “Syri i Vizionit” në Pejë.
Për djegien e balonës dhe reagimet e qytetarëve s’kanë pranuar të deklarohen drejtoresha e Zhvillimit Ekonomik, Lendita Muhaxheri, e as kryetari i Komunës, Gazmend Muhaxheri, që ka shfrytëzuar rrjetet sociale për të thënë se “djegia e ka trishtuar tmerrësisht”.