Emrin “Arbnor dhe Astrit Dehari” do ta mbajë rruga para hyrjes së Qendrës Klinike Universitare të Kosovës, në Prishtinë.
Kjo pasi me propozim të asamblistit të Vetëvendosjes, Egzon Azemi, Kuvendi i Kryeqytetit ka marrë vendim për zëvendësimin e emrit të rrugës “Çlirimi”, me emrin e dy ish-aktivistëve të kësaj partie, ndërsa “Çlirimi” i është vendosur parkut në afërsi të rrugës “Bahri Fazliu”, raporton KTV.
Edhe pse propozimi mori përkrahjen e shumicës, për gati gjysmë ore u diskutua nëse duhej krijuar një komision për emërtimin e rrugëve apo vetëm të votohej ndryshimi.
Paraprakisht, fillimi i seancës kaloi me debat jashtë rendit të ditës dhe vetëm për miratim të rendit të ditës, asamblistëve iu deshën gati një orë e gjysmë.
Përplasje pati edhe kur asamblistët opozitarë thanë se gjetjet në raportin e auditimit për pasqyrat financiare për vitin 2017 dëshmojnë planifikimin e dobët dhe vonesat në kryerjen e punëve.
Por përfaqësuesi i ekzekutivit tha se ky është raporti më i mirë i auditorit ndonjëherë.
Në këtë mbledhje u zgjodhën edhe dy aksionarë në “Pallatin e Rinisë”. Mimoza Sylejmani nga PSD-ja dhe Shefqet Osmani i LDK-së janë anëtarët e rinj të komisionit të aksionarëve në ndërmarrjen që së fundmi iu kthye Komunës së Prishtinës.
Me mbështetje të plotë, asamblistët e miratuan edhe statutin e Muzeut të Prishtinës.
