-
Nga:
Ilir Osmanaj
- 18 prill 2021 21:51
- Shpërndaje në:
Rruga alternative që lidh Pejën me Rugovën, konkretisht nga Maja e Zezë në drejtim të Qafës së Peklenes, Shtupeq i Vogël e deri te vendi i quajtur Varri i Sykut ende nuk ka përfunduar.
Kjo rrugë ishte paraparë të përfundonte brenda 3 vjetëve, por tash janë bërë 4 vjet prejse ka filluar punimet dhe ato ende janë në fazën e parë.
Sipas operatorit fitues, punimet janë realizuar varësisht nga sigurimi i mjeteve nga Ministria e Infrastrukturës, si financuese e këtij projekti.
“Deri në Qafë të Peklenes që del, ajo kryhet sivjet, pat pare a spat pare. Se u bë tepër dhe jam i interesuar me përfundu”, ka thënë pronari i kompanisë “Graniti”, Ismet Loshi.
Faza e dytë e saj ka 5 kilometra që përfshin pjesën nga Qafa e Peklenes deri në vendin Varri i Sykut.
Edhe
Banorët kërkojnë hapjen e kufirit në Çakorr, institucionet heshtin
Tenderi i shpallur në shtatorin e kaluar për këtë segment pas rivlerësimit të tij nga fillimi i shkurtit gjendet sërish në Organin Shqyrtues të Prokurimit, për shkak të ankesave të operatorëve konkurrues.
Lënda është bllokuar në OSHP, për shkak se prej 31 marsit i ka skaduar mandati Bordit të OSHP-së dhe pa Panelin Shqyrtues nuk do të mund të shqyrtohen ankesat e operatorëve ekonomikë.
“Ka mbet lënda ende pa u zgjedh dhe tani paneli nuk është funksional pasi që i ka skaduar mandati. Duhet tash me prit dhe për fatin e kësaj lënde na njoftojnë ata çka me vepruar ma tutje”, ka thënë menaxheri i Zyrës së prokurimit në Komunën e Pejës, Xhemë Berisha.
Bordi i ri duhet të emërohet nga Qeveria, e cila emrat për kandidatët i dërgon në Kuvendin e Kosovës për votim.
Edhe
Pa zgjidhje takimi mes përfaqësuesve të kompanive të autobusëve dhe zyrtarëve të Prishtinës
KOHA ka kërkuar përgjigjeje nga Ekzekutivi lidhur me përzgjedhjen e bordit të ri të OSHP-së, por nuk ka marrë përgjigje.
