-
Nga:
Majlinda Ibrahimi
- 29 dhjetor 2022 13:39
- Shpërndaje në:
Ministrja e Arsimit, Arbërie Nagavci, ka deklaruar se nuk do të ketë Kontratë Kolektive të veçantë për Sindikatën e Bashkuar të Arsimit, Shkencës dhe Kulturës (SBASHK), siç ka qenë deri më tani.
Të enjten në konferencën e fundvitit, Nagavci, e cila para disa javëve, ka shkëputur Kontratën Kolektive me SBASHK-un, ka thënë se shpreson që kontratat të tilla politike të mos ketë në të ardhmen.
“Për Kontratën Kolektive nuk kemi opinion ligjor se ka pasur shkëputje të njëanshme ashtu siç pretendon SBASHK-u. Unë shpresojë që asnjëherë më të mos realizohen kontrata të këtilla për qëllime politike. Benefitet ata asnjëherë nuk i kanë marrë, ato është dashur që përmes gjykatave t’i marrin ato. Në raport me kontratën e re, ne jemi në bisedime edhe me Qeverinë që të ketë kontratë të përgjithshme kolektive e jo në sektorë”, ka thënë Nagavci.
Në Kontratën Kolektive të shkëputur, parashiheshin benifite për mësimdhënësit, për mbulimin e shpenzimeve për udhëtim, kompensim të shujtës dhe shpërblim jubilar, pasi e ka kualifikuar sit ë jashtëligjshme
Shkëputjen e Kontratës SBASHK-u e ka quajtur veprim anti-ligjor.
Nagavci po ashtu është deklaruar për mos arritjen e kompensimit të 22 ditëve mësimore, të humbura gjatë mbajtjes së grevës.
Ajo ka thënë se pretendimet e prindërve se fëmijët pësojnë lodhje psikike me mbajtjen e mësimit gjatë ditëve të shtuna, nuk qëndrojnë.
“Unë ju bëjë thirrje të gjithëve që ta zbatojnë kalendarin e ri shkollor në plotësi. Diskutimet për lodhjen e fëmijëve nuk qëndrojnë, sidomos pas pushimit veror të stërzgjatur”, ka thënë ajo.
Sa i përket 32 zyrtarëve serbë, Nagavci, ka thënë se ata i janë rikthyer punës dhe çdo dy javë janë duke dërguar raporte për angazhimin e tyre. Në kohën kur zyrtarët serbë filluan të japin dorëheqje si shenjë pakënaqësie për planin e Qeverisë së Kosovës për riregjistrimin e makinave që kanë targa serbe, Nagavci ka thënë se në adresë të ministrisë së saj nuk është paraqitur asnjë flet-dorëheqje
“Kemi pasur një njoftim që dorëheqjet t’i marrin në veri, mirëpo asnjë dorëheqje zyrtarisht nuk ka ardhur në ministrinë tonë. Të gjithë janë duke punuar”, ka thënë ajo.
Sa i përket dorëheqjes së zëvendësministrit Dukagjin Pupovci, ajo nuk ka treguar se kush do të vijë në vend të tij.
