Ish-gjyqtarja e Gjykatës Kushtetuese dhe njëra nga hartueset e Kushtetutës, Gjylieta Mushkolaj në emisionin “Konfront” në KTV, deklaroi se Ahtisaari ka pasur shumë kujdes në të drejtat që iu ka dhënë pakicave në Kosovë.
Sa i përket mos-zgjedhjes së nënkryetarit serb, Mushkolaj tha se kjo nuk do të thotë që bllokohet shteti.
Sipas saj, disa studiues, Kosovës i referohen si shtet konsociacional, mirëpo një gjë e tillë nuk është faktike. Bosnja po, mirëpo Kosova nuk ka një status të tillë, deklaroi Mushkolaj.
Krasniqi: Kushtetuesja e paparashikueshme, e ndikuar politikisht
Opinionisti Besnik Krasniqi ka thënë se Gjykata Kushtetuese prej kohësh është bërë e paparashikueshme.
Krasniqi në “Konfront” të KTV-së ka thënë se vendimet e Kushtetueses po diktohen prej politikës.
“Me fol për peshën e Gjykatës Kushtetuese, duhet me u nis nga një premisë, e që është që Kushtetuesja prej kohësh është bërë e paparashikueshme. Vendimmarrja në të është bërë e paparashikueshme, pasi ky institucion po sillet si një mjet hegjemon...Nuk po merr vendime duke u bazuar në Kushtetutë, nuk po merr vendime duke u bazuar në atë që ka vendosur paraprakisht, por po merr vendime që më shumë po diktohen prej politikës, prej subjekteve të caktuara politike që kanë pasur historikisht ndikim në gjykatë, e ndoshta edhe prej, siç e përmendi z. Sopi, urdhrave e mesazheve nga Dragodani, që mund t’u shkojnë gjyqtarëve”, tha Krasniqi.
E ish-gjyqtarja e Kushtetueses, Gjylieta Mushkolaj, tha se është tepër e rëndë të thuhet kjo.
Mushkolaj tha se sa ishte ajo në Kushtetuese “kurrë në asnjë rast ai Dragodani që po e përmend, kurrë s’ka ndërhy”.
“Është ndërtuar kjo prej atyre që kanë dashur të kenë ndikim e ta mashtrojnë popullin që është dikush më i fuqishëm”, tha Mushkolaj.
Mushkolaj: Kuvendi është konstituar me zgjedhjen e kryetarit, nënkryetarët “pa kompetenca”
Ish-gjyqtarja e Gjykatës Kushtetuese, Gjylieta Mushkolaj, ka thënë se legjislatura e nëntë e Kuvendit të Kosovës është konstituuar. Ajo ka thënë se konstituimi është kryer me zgjedhjen e kryetarit Dimal Basha, ndërsa ka insistuar se nënkryetarët nuk kanë kompetenca sa i përket legjislaturës, deri kur ato ua delegon kryetari.
“Besoj që legjislatura e re konsiderohet të jetë e konstituuar meqenëse është zgjedhur kryetari i kësaj legjislature... Kushtetuta është relativisht e qartë dhe është e bazuar në parimet më të rëndësishme të një demokracie parlamentare. Nuk po them shtet parlamentar, por demokraci parlamentare për faktin se Kushtetuta e përcakton qartë se cilat janë detyrat e kryetarit të Kuvendit dhe cilat të kryesisë së Kuvendit. Detyrat e kryetarit janë kompetenca kushtetuese dhe politike që e bëjnë udhëheqjen e një institucioni më të rëndësishëm, të vetmit të zgjedhur direkt nga populli, e bëjnë funksional”, ka thënë ajo në “Konfront” të KTV-së.
Sipas Mushkolajt, kryetari e bën funksional Kuvendin për shkak se i ka të gjitha kompetencat për ta udhëhequr legjislaturën.
E kryesia, siç ka thënë ajo, merret vetëm me çështje administrativ të funksionimit të Kuvendit “jo si legjislaturë, por si shtëpi, si institucion”.
“Shërben si njëfarë bordi për administratën e Kuvendit. Kryesia e Kuvendit nuk ka ndonjë detyrë tjetër përveçse të kujdeset për mbarëvajtjen e punës së administratës së Kuvendit. S’ka kompetencë rreth funksionimit të Kuvendit si legjislaturë. Kushtetuta thotë qartë se Kryesia e Kuvendit merret me funksione administrative të përcaktuara me rregulloren e punës së Kuvendit”, ka thënë Mushkolaj, që ka shtuar se në Kosovë po është zor të kuptohet pavarësia dhe se më nuk ekziston korniza e UNMIK-ut e se “Kushtetuta e ka ndërruar komplet konceptin e Kryesisë”.
Ditë më parë, deputetët zgjodhën Dimal Bashën kryeparlamentare e Kuvendi nuk e zgjodhi nënkryetarin serb. Deputetët e zgjodhën nënkryetarin e komuniteteve joserbe, por nuk mori mbështetje propozimi i Listës Serbe për Sllavko Simiqin. Ai dështoi tre herë në votim. Kryetari Basha u shpreh se vendimi i Kushtetueses thotë që as për nënkryetarët një emër nuk mund të votohet mbi tre herë. Kështu ai i kërkoi emra të tjerë Listës Serbe, por që ajo nuk ofroi. E si pasojë, Basha çoi Kuvendin në votimin përmes shortit për nënkryetarin serb. Nga 10 deputetët, përfshirë Nenad Rashiqin që s’është i kësaj partie, askush s’i mori 61 votat e kërkuara. Pa nënkryetar serb, më 30 gusht, Basha e shpalli të konstituuar Kuvendin. E në opozitë dhe në shoqërinë civile kanë vlerësuar se Kuvendi nuk ka mbyllur konstituimin. Lista Serbe tani është ankuar në Gjykatën Kushtetuese sa i përket ndarjes së votimeve për nënkryetarët e komuniteteve.