Ministria e Mbrojtjes e Serbisë i mohon akuzat e Kurtit për sulmin në Banjskë

Ministri serb i Mbrojtjes, Millosh Vuçeviq i është përgjigjur kryeministrit të Kosovës, Albin Kurti i cili sot deklaroi se sulmi në Banjskë është kryer nga Klani i Novi Sadit në krye me Vuçeviqin.

Ministria e Mbrojtjes së Serbisë ka thënë se i hedh poshtë këto deklarata dhe i ka bërë thirrje komunitetit ndërkombëtarë të reagojë.

“Theksojmë se në interes të ruajtjes së paqes dhe stabilitetit në Kosovë, është e një rëndësie vendimtare që institucionet në Prishtinë të detyrohen që menjëherë të ndalojnë terrorin e përditshëm ndaj popullatës serbe, të zbatojnë të gjitha marrëveshjet e mëparshme dhe të formojnë menjëherë Asociacionin e Komunave Serbe. Gënjeshtrat e pacipë, fyerjet dhe shpifjet që Kurti nxjerr çdo ditë si pjesë e një fushate të ndyrë mediatike kundër shtetit të Serbisë dhe lidershipit të saj, zbulojnë plotësisht synimet e tij për të shkatërruar çdo mundësi për qetësimin e tensioneve”, thuhet në reagim.

Ministria serbe e Mbrojtjes ka deklaruar se “deklaratat e sotme janë dëshmi e padyshimtë, interesi i të cilave është shkaktimi i kaosit dhe dhunës”.

Kryeministri i Kosovës, Albin Kurti ka thënë se sulmin në Banjskë të Zveçanit e ka organizuar Klani i Novi Sadit.

Sipas tij, në krye të tij ndodhet ministri i Mbrojtjes së Serbisë, Millosh Vuçeviq.

Edhe LAJMET E MBRËMJES 23 tet 2023 Kurti: Sulmi në Banjskë u organizua nga Klani i Novi Sadit në krye me ministrin serb të Mbrojtjes

“Ai është kryetari i partisë-shtet SNS, tri herë i zgjedhur kryebashkiak i Novi Sadit me ndihmën e Zvonko Veselinoviqit, dhe miku më i afërt i vëllait të Presidentit të Serbisë, Andrej Vuçiq”, ka shkruar Kurti në Facebook.