Ministri i Shëndetësisë, Uran Ismaili sot ka emëruar Fatmir Plakiqin, drejtor të Fondit për sigurime shëndetësore.
Ka thënë se sigurimet Shëndetësore tashmë i kanë shndërruar në prioritet kombëtar, në mënyrë që kështu të zbutet varfëria, transmeton Koha.net.
Postimi i plotë i Ismailit në Facebook:
I urova mirëseardhje drejtorit (u.d.) të ri të Fondit të Sigurimeve Shëndetësore, Fatmir Plakiqi.
Zotëri Plakiqi vjen në këtë pozitë pas një përvoje shumë të madhe dhe të pasur institucionale. Ai ka zhvilluar dhe ka transformuar disa prej institucioneve më të rëndësishme të vendit, nga pika fillestare në institucione të fuqishme, kredibile dhe shumë të suksesshme.
Për pesë vite ka qenë drejtor i Thesarit dhe anëtar i Bordit të Bankës Qendrore. Para saj ai ka shërbyer edhe si drejtor i Drejtorisë për Buxhet dhe Financa në Policinë e Kosovës dhe drejtor i administratës në Agjencinë Kosovare të Inteligjencës.
Sigurimet Shëndetësore tashmë i kemi shndërruar në prioritet kombëtar, në mënyrë që të zbusim varfërinë e qytetarëve tanë, për realizimin e të cilave po angazhojmë kuadrot më profesionale që ky proces të përfundojë në afatin e duhur.
Kujtojmë se më herët, burri i motrës së kryeministrit Ramush Haradinaj, Liridon Dërvishaj, është emëruar t’i menaxhojë paratë e Fondit të Sigurimeve Shëndetësore.
Dërvishaj ka marrë pozitën e drejtorit të Departamentit të Financave dhe Shërbimeve të Përgjithshme në kuadër të Agjencisë për Financimin e Shëndetësisë, AFSH.